Марха «Севернай» кыбаарталыгар уһуйаан тутуллуоҕа

Олунньу 8 күнүгэр Олохтоох дьаһалта 2024 сыллааҕы үлэтинэн уонна 2025 сылга былааннарынан Марха олохтоохторун иннигэр отчуоту баһылыгы бастакы солбуйааччы Георгий Гаврильев оҥордо.
Ол курдук, мархалар «Севернай» кыбаарталга тутуллар уһуйаан 2026 сылга үлэҕэ киирээри турарын үөрэ иһиттилэр. Бэлиэтээн эттэххэ, эбийиэк дойду баһылыга Владимир Путин өйөбүлүнэн олоххо киирэр маастар-былаан бырайыага.
Оттон ааспыт сылга Мархаҕа 1 №-дээх оскуолаҕа эбии куорпус тутуллан, оҕолор биир симиэнэнэн үөрэнэр кыахтаннылар. Маны сэргэ Кадеттар оскуолалара үлэҕэ киирбитэ.
Саҥа «Севернай» кыбаартал суолун хапытаалынай өрөмүөнүн иккис уочарата түмүктэммитэ, Мелиоратордар уулуссаларыгар хапытаалынай өрөмүөн ыытыллыбыта, Можайскай уулуссатын Пилоттар уулуссаларыттан Строд уулуссатыгар диэри кэрчигэ саҥардыллыбыта.
Хаарбах дьиэттэн көһөрүү бырагырааматынан Заводская уонна Газовиктар уулуссаларын дьиэлэрин олохтоохторо көһөрүллүбүттэрэ. Газовиктар уонна Экспериментальная уулуссалар олохтоохторун көһөрүү салҕанар. Маҕан трагын 2-с км элбэх кыбартыыралаах дьиэ үлэҕэ киирбитэ. 
Марха олохтоохторо бэйэлэрин өттүлэриттэн «Каспер» маҕаһыыҥҥа киирэр суол өрөмүөнүн, «Сатал» СОНТ таһынааҕы суолу уонна оптуобус тохтобулун муниципальнай бас билиигэ биэриини туруорустулр. Кытаанах бөҕү тоҕор сирдэри тэрийии, санитарнай туочука ахсаанын элбэтии боппуруостара эмиэ таарылыннылар, диэн иһитиннэрэр Олохтоох дьаһалта пресс-сулууспата.