Марафоҥҥа ситиһии тосхойор

Уонча сыл тохтобул кэнниттэн улахан спордунан дьарыктаныытын салҕаабыт, бэйэтин кэмигэр “Азия оҕолоругар” сүүрүүгэ дьоҕурдааҕын биллэрбит, Үөһээ Бүлүүттэн төрүттээх, билигин Горнай улууһун Бэрдьигэстээҕэр икки улахан уоллаах ыал ийэтэ Алена Татаринова (Узнаева) дойду сүүрэр суолларыгар кэккэ ситиһиилэринэн үөртэ.

Ол курдук, Алена Арассыыйа чемпионатыгар 42 км классическай марафоҥҥа үрүҥ көмүс уонна боруонса мэтээллэргэ тикситэлээтэ. “Белые ночи” норуоттар икки ардыларынааҕы марафону кыайда, “Москва марафоннарыгар” ситиһиилэрдэннэ. Салгыы Соҕуруу Африкаҕа 98-с төгүлүн ыытыллар “Комрадс” ультрамарафонугар кыттарга бэлэмнэнэр. Биллиилээх быһыйбыт Татьяна Жиркова 89 км ультрамарафону 5 чаас 57 мүн. 50 сөк. түмүктээн, чөмпүйүөн үрдүк аатын ылбыта, дьоһун аата аан дойду историятыгар тиһиллибитэ. Бэс ыйын 8 күнүгэр буолар “Комрадс” марафонугар Саха сириттэн Алена Татариноваттан ураты Ольга Винокурова уонна Байан Васильев сүүрүөхтэрэ. Ситиһии тосхойдун!