“Манчаары түөкүн" бэйэ ис туругун өйдүүргэ көмөлөһүөҕэ

Саҥа бэлиэ күн 120 сыл анараа өттүгэр, 1906 сыл тохсунньу 3, билиҥҥинэн тохсунньу 16 күнүгэр, Саха тыйаатыра Петр Аммосович Охлопков-Наара Суох «Бэрт киһи Бэриэт Бэргэн» олоҥхотун туруорбутун кытта ситимнээх.

Саха национальнай тыйаатырын бастакы туруорууларыгар биллиилээх судаарыстыбаннай уонна политическай диэйэтэл В.В. Никифоров-Күлүмнүүр сүҥкэн кылаатын уонна 1906 сыллаахха суруйбут "Манчаары түөкүн" бастакы сахалыы драматическай айымньытын бэлиэтигэр Былатыан Ойуунускай аатынан Саха академическай драмтыйаатыра тохсунньу 17 күнүгэр киэһэ 17.00 чаастан режиссер Руслан Тараховскай туруоруутугар «Манчаары» испэктээккэ ыҥырар.

«Бастатан туран, бу судургу устуоруйа буолбатах. Баһылай Манчаары — саха норуотугар көҥүл, кырдьык уонна күүстээх санаа бэлиэтэ. Кини олоҕо — батталга бэриммэт буолуу, бэйэ быраабын уонна чиэһин көмүскээһин холобура. Күлүмнүүр бэйэтин кэмигэр бу драма нөҥүө норуот өйүн-санаатын уһугуннарар уонна кэскилгэ эрэннэрэр сыаллааҕа, - диэн суруйар Саха тыйаатырын тг-ханаала. - Бу туруорууну көрүү — төрүт култуурабытыгар төннүү эрэ буолбакка, бэйэбит ис турукпутун, норуот быһыытынан уратыбытын өйдөөһүн буолар. Саха театра эһигини үйэлээх классиканы бииргэ арыйарга ыҥырар.