Макарон дуу, макарун дуу?

Бу төгүрүк быһыылаах минньигэс ас миндаль бурдуктан, сымыыт үрүҥүттэн, саахар сиробуттан оҥоһуллар. 18-с үйэттэн  үөдүйбүт пирожнай күн бүгүн 500-тэн тахса арааһа баара биллэр. Түргэнник, сып-сап астыам диэн саараммат эбиккин, кондитертан үрдүк маастарыстыбаны уонна бэлэмнэниини эрэйэр. Амтана да араас буолар: ваниль, сакалаат, тирамису, кофе, горгонзола уонна груша, манго-маракуйя, лимон, о.д.а. Бэл диэтэр, клен сироптаах, беконнаах, ону ааһан васаби, водоросль булкаастаах макароннар бааллар.  Аан дойду рестораннарыгар эт, балык, оннооҕор кус амтаннаах макароннары амсайыахха сөп.

Аны туран, сорохтор макарун диэн кокостаах Америка бэчиэнньэтин кытта бутуйаллара үгүс. Суруллаллара да, иһиллэллэрэ да майгыннаһар эрээри, икки тус-туспа десертэр.