«Мадьыны сэргэтиттэн» ылыллыбыт Ытык Уот Монголияҕа уматыллыаҕа

От ыйын 31 – атырдьах ыйын 2 күннэригэр Монголияҕа буолар мас тардыһыыга аан дойду VII чемпионатыгар бэлэмнэнии тэрээһиннээхтик ааста. Тэрээһин биир арылхай көстүүтүнэн Улуу Туймаада киэҥ хочотун ыһыахтыыр сиригэр «Үс Хатыҥҥа» Норуоттар икки ардыларынааҕы мас тардыһыытын федерациятын бэрэсидьиэнэ Александр Константинович Акимов көҕүлээһининэн 2022 сыллаахха туруоруллубут үрдүк мэҥэ халлааҥҥа тардыһар баараҕай «Мадьыны сэргэтиттэн» Аан дойду чемпионатыгар тиэрдиллиэхтээх Ытык Уоту ылыы сиэрэ-туома буолла.

Норуоттар икки ардыларынааҕы мас тардыһыытын федерациятын (МФМР) I вице-бэрэсидьиэнэ Александр Ким-Кимэн,  МФМР генеральнай сэкирэтээрэ Иннокентий Григорьев, Бүтүн Арассыыйатааҕы мас тардыһыытын федерациятын бэрэсидьиэнэ Михаил Гуляев, Саха Өрөспүүбүлүкэтин мас тардыһыыга федерациятын бэрэсидьиэнин  солбуйааччы Игорь Борисов, чемпионат сүрүн үбүлээччитэ, «Киэргэ» ювелирнай фирма салайааччыта Александр Павлов былыргы өбүгэлэрбит төрүт күрэс көрүҥнэрин сайыннарар, култуураларын, үтүө үгэстэрин өйдөтөр-санатар, мас тардыһыытынан бүгүн аан дойду биэс континеннарын 62 дойдулара сөбүлээн дьарыктаналларын, «Мадьыны сэргэтиттэн» Ытык Уоту ылан аан дойду чемпионаттарыгар тиэрдии үтүө үгэскэ кубулутуллуохтааҕын туһунан дириҥ суолталаах эҕэрдэлэри эттилэр.

Улуу Туймаада киэҥ киэлититтэн Ытык Уоту ылыы долгутуулаах сиэрин-туомун Монголияны кытта ыкса ситимнээх, Монголия Өрөспүүбүлүкэтин мас тардыһыыга федерациятын вице-бэрэсидьиэнэ, Тоҥ Суорун хос-хос хаан сиэнэ, Николай Баишев сиэн быраата Дмитрий Захарович Баишев аал уот оттон, арыылаах алаадьынан, сахалыы уохтаах кымыһынан күндүлээтэ-маанылаата, алгыһын анаата.

Салгыы өрөспүүбүлүкэ мас тардыһыыга федерациятын I вице-бэрэсидьиэнэ Игорь Борисов факелга уот саҕан, Бүтүн Арассыыйатааҕы мас тардыһыытын федерациятын бэрэсидьиэнэ  Михаил Гуляевка, Михаил Гуляев оҕолорго аан дойду чемпионатыгар кыттыыны ылар эдэр көлүөнэ күрэсчитигэр, онтон мас тардыһыытын аныгы ньыматын олоххо киллэрсибит Георгий Цыпандин ылан, аан дойдутааҕы мас тардыһыытын федерациятын генеральнай сэкирэтээрэ Иннокентий Григорьев ылан, МФМР Президиумун чилиэнэ Александр Павловы кытта Ытык Уоту факелтан ыланнар, ыраах айаҥҥа турунуохтаах анал лампаадаҕа уматтылар. Саха Өрөспүүбүлүкэтиттэн мас тардыһыы аан дойдутааҕы чемпионатыгар Арассыыйа сүүмэрдэммит хамаандатыгар киллэриллибит аҕыс эдэр күрэсчиттэрдээх бөлөх факелы уонна капсуланы илиилэригэр тутаннар тус арҕаа Монголия диэки сүүрэ турдулар.

Үөрүүлээх сиэргэ-туомҥа Бүтүн Арассыыйатааҕы мас тардыһыы федерациятын толорооччу дириэктэрэ Иван Сивцев, Саха сиригэр мас тардыһыы спордун бастакы  маастара Петр Каратаев, оҕолорго сүүмэрдэммит хамаанда сүрүн тренерэ Алексей Агапов, чемпионаты сырдата барыахтаах суруналыыстар Владислав Коротов, Александр Посельскай кыттыыны ыллылар.

Ытык уот Монголияҕа Архангай аймак сиригэр тиэрдиллэн, Аан дойду чемпионата үөрүүлээхтик аһыллыытын үгэнигэр уматыллыаҕа. Өбүгэлэрбит оонньууларын өрө тутаммыт улахан спорт көрүҥүгэр кубулуппуппутунан киэн туттабыт!

We com WORLD Сhampion Ship!