Маһы көҥүлэ суох кэрдибит тэрилтэ хоромньуну толуйуо

Дьокуускай сиригэр-уотугар маһы-талаҕы кэрдии Олохтоох дьаһалтаттан туһааннаах көҥүлү ылары ирдиир.

Көҥүлү Дьиэ-уот-хомунаалынай хаһаайыстыба уонна энергетика департаменыгар ирдэнэр докумуоннары кытта сайабылыанньа суруйан ылыахха сөп. Онно Дьокуускай куорат дьаһалтата 2015 сыл муус устар 16 күнүгэр 108п № -дээх (2021 с. атырдьах ыйын 13 к. эрэдээксийэлэммит) уурааҕынан бигэргэтиллибит «Дьокуускай куорат» куораттааҕы уокурук сиригэр-уотугар күөх үүнээйини кэрдиигэ көҥүлү биэриигэ муниципальнай өҥөнү оҥоруу административнай регламеныгар ыйыллыбыт докумуоннар толору кэмпилиэктэрэ ирдэнэр.

Бу аҕыйах хонуктааҕыта Дьокуускайдааҕы Дьиэ-уот-хомунаалынай хаһаайыстыба уонна энергетика департамена Хабаров аатынан уулусса 11-с дьиэтин учаастагар маһы-талаҕы көҥүлэ суох кэрдибиттэрин иһитиннэрдэ.

Департамент бу дьыл муус устар 23 күнүгэр Хабаров уулуссатыгар хапытаалынай өрөмүөнү ыытар бэдэрээтчит «РИК Автодор» хампаанньаҕа Хабаров уулуссатын 3, 9, 19, 19/4, 21 №-дээх дьиэлэр учаастактарыгар уонна Георгий Победоносец скверин таһыгар эрэ күөх үүнээйини кэрдэригэр көҥүл биэрбитэ ыйыллар.

Дьокуускай уокуруктааҕы дьаһалтата иһитиннэрбитинэн, бэдэрээтчит билигин Хабаров уулуссатыгар ууну ыытар лотуоктары уонна сатыы дьон сылдьар тротуарын тутууга бэлэмнэнии үлэтин ыыта сылдьар.

Бу көҥүлэ суох кэрдиллибит мастар боппуруостарынан атырдьах ыйын 4 күнүгэр Дьокуускайдааҕы муниципальнай иниспиэксийэ, «Главстрой» МКУ уонна «РИК Автодор» АУо бэрэстэбиитэллэрэ кыттыылаах мунньах буолла. Ол түмүгэр бэдэрээтчит тэрилтэҕэ кэрдибит олордуу мастарын чөлүгэр түһэрэригэр, хас суулларбыт биир маһын оннугар 50-нуу күөх олордууну ыытарыгар дьаһал бэрилиннэ.

«Главстрой» МКУ быһаарарынан, бигэргэтиллибит бырайыактыыр-симиэтэлиир докумуон быһыытынан бу учаастакка 90 см кэтиттээх ууну ыытар лотуок ситимэ тардыллыахтаах. Суол кытыытыгар үүнэн турар мастары кэрдибэккэ эрэ тротуардары уонна лотуоктары тутар биир үксүн кыаллыбат. Уулусса икки кытыытынан 2 м кэтиттээх тротуар оҥоһуллуохтаах.

«Главстрой» МКУ суолу тутууга салаатын исписэлииһэ Артем Кычкин иһитиннэрбитинэн, билигин Хабаров уулуссатын уонна Ленин проспегын быһа охсуһууларыгар 8 см халыҥнаах аспаал бүрүөһүнүн алын араҥатын тэлгиир үлэ салҕанар. Бу иннинэ маннык үлэ Ярославскай уулуссатыттан Чиряевка диэри учаастагар ыытыллыбыта. Артем Кычкин бэлиэтээбитинэн, бу үлэни сэргэ тротуар билииккэлэрин тэлгиир, сыҥаһа аҕыраада, ууну ыытар лотуок акылааттарын, траншеяны оҥоруу үлэлэрэ ыытыллаллар.

Санатар буоллахха, «Олох инфраструктурата» саҥа национальнай бырайыагынан 2025 с. Дьокуускайга 11 уулусса-суол ситимин эбийиэгэ өрөмүөннэниэхтээх, онтон 8-һа – сүрүн, 3-һэ – резервнэй. Өрөмүөннэнэр суол уопсай устата – 14,1 км.  

Хаартыска: Дьокуускай уокуруктааҕы дьаһалтатын сайтыттан

Маһы кэрдэргэ көҥүлү ыларга дьаһаныы бэрээдэгэ:
• Дьокуускай уокуруктааҕы дьаһалтатын Дьиэҕэ-уокка-хомунаалынай хаһаайыстыбаҕа уонна энергетикаҕа департаменыгар тиийиллэр.
• Сайабылыанньа суруйааччы боломуочуйатын бигэргэтэр докумуоннары сэргэ дендробылааны уонна  кэрдиллиэхтээх күөх үүнээйилэр ааҕыллыбыт биэдэмистибэлэрин туттарыллар.
• Көҥүлү ылбыт кэннэ, маһы кэрдии үлэтин анал лицензиялаах хампаанньалар эрэ, куттал суох буолуутун бары нуормаларын тутуһан туран, ыыталлара ирдэнэр. 
Маһы кэрдэр үлэҕэ араас ньымалар, үстүрүмүөннэр, ол иһигэр автовышкалар уонна анал альпинистскай тэрил туттуллуохтарын сөбүн учуоттуур наада.
Маһы кэрдэргэ көҥүлү ылыы иһин чопчу туох ирдэнэрин сиһилии Дьокуускай куорат дьаһалтатын официальнай сайтыгар «Информация о предоставлении муниципальной услуги по выдаче разрешений на санитарную, формовочную обрезку деревьев и кустарников, снос (пересадку) зеленых насаждений на территории городского округа «город Якутск» салааҕа билсиэххэ сөп. Эбэтэр, мунаарар буоллахха, «Куорат хаһаайыстыбатын эксплуатациялааһын сулууспата» МКУ-га эбэтэр куорат дьаһалтатыгар айылҕа харыстабылын салаатыгар тиийэн сүбэлэттэриэххэ сөп.