Маҥнайгы кылааска сурутуу чугаһаата

Куораттааҕы үөрэх управлениета иһитиннэрбитинэн, 2025/2026 үөрэх дьылыгар оҕолору маҥнайгы кылааска ылыы икки түһүмэҕинэн ыытыллыаҕа.

Бастакы түһүмэх муус устар 1 күнүттэн бэс ыйын 30 күнүгэр диэри салҕаныаҕа. Манна сүрүн ирдэбиллэринэн прописка уонна уочарата суох эбэтэр бастакы уочарат ылыллар араҥаҕа киирсии буолар (онно кимнээх киирэллэрин салгыы сиһилии аах).

Иккис түһүмэх от ыйын 6 күнүттэн миэстэ барыта туолуор диэри, ол эрээри 2025 сыл балаҕан ыйын 5 күнүн аһарбакка эрэ ыытыллыаҕа.   Бу түһүмэх кэмигэр миэстэ баар буоллаҕына, атын оскуолаҕа сайабылыанньа биэриэххэ сөп. 

Болҕойуҥ!

Сорох оскуолаларга миэстэ былдьаһыга кистэл буолбатах, кылаастар көрүөх бэтэрээ өттүгэр туолуохтарын сөп.  Онуоха Үөрэх управлениета бу курдук сүбэлиир: кулун тутар 17 күнүттэн төрөппүттэр (сокуоннай бэрэстэбиитэллэр) судаарыстыбаннай өҥөлөр биир кэлим порталларыгар сайабылыанньаҕытын эрдэттэн суруйан бэлэмниэххитин сөп. Оччоҕуна муус устар 1 күнүгэр, сайаапканы ылыы саҕаланаатын кытта, тус кэбиниэккэ киирэн, черновиккытын булан ылан “отправить” эрэ диэн кнопканы баттыаххытын наада.

Бастакы түһүмэх

Муус устар 1 күнүттэн Госуслуги нөҥүө киин куорат территориятыгар киирэр (кытыы нэһилиэктэр эмиэ) 47 үөрэх кыһата сайаапкалары тутар.

Иккис түһүмэх

Үөһэ этиллибитин курдук, иккис түһүмэх от ыйын 6 күнүттэн саҕаланар. Ол чэрчитинэн:

- муниципальнай үөрэх тэрилтэлэригэр миэстэ бүтүөр диэри баҕалаах дьонтон сайабылыанньалары ылаллар;

- Психолог-медик-педагог хамыыһыйатын быһаарыытынан муниципальнай уопсай үөрэхтээһин коррекционнай тэрилтэлэригэр сайаапкалары ылаллар:

1. 4 №-дээх Анал (коррекционнай) уопсай үөрэхтээһин оскуолатыгар;

2. 22 №-дээх Анал (коррекционнай) уопсай үөрэхтээһин оскуолатыгар (VII вид);

3. 28 №-дээх Адаптированнай интэринээт-оскуолаҕа;

4. Адаптивнай үөрэхтээһин комплексыгар.

- С.Ф. Гоголев аатынан 1-кы №-дээх Дьокуускайдааҕы педколледж алын сүһүөх оскуолатыгар сайабылыанньалары ылаллар.

- Маны сэргэ, иккис түһүмэх иитинэн Дьокуускай куорат сиригэр-уотугар үлэлиир чааһынай оскуолаларга сайабылыанньалары туталлар:

1. Карамзина Т.И. «Гран» алын оскуолата;

2. Бурнашев А.А. «САХАТ» чааһынай оскуолата;

3. Дьокуускай куорат Гуманитарнай лиссиэйэ;

4. «Восточно-сибирский лицей».

5. «Точка развития» чааһынай оскуола.

Уочарата суох ылыллаллар

Интэринээттээх уопсай үөрэхтээһин тэрилтэлэригэр:

- прокурор оҕолоро;

- судьуйа оҕолоро;

- Силиэстийэлиир кэмитиэт үлэһиттэрин оҕолоро.

Судаарыстыбаннай уонна муниципальнай тэрилтэлэргэ:

- байыаннай сулууспалаахтар, национальнай гвардия үлэһиттэрин оҕолоро, анал байыаннай дьайыыга баҕа өттүнэн барбыт, суорума суолламмыт (өлбүт) эбэтэр оһолломмут (бааһырыы, эчэйии, контузия) дьон оҕолоро.   

Бастакы уочарат ылыллаллар

Уопсай үөрэхтээһин тэрилтэлэригэр:

- Мобилизацияланан эбэтэр хантараагынан барбыт байыаннай сулууспалаахтар, байыаннай сулууспаттан саастарынан эбэтэр доруобуйаларын туругунан эбэтэр ОШМ сибээстээн уурайбыттар оҕолоро;

- Полиция үлэһиттэрин уонна Федеральнай сокуон 46-с ыст. 6-с чааһыгар ааттаммыт гражданнар оҕолоро;

- Ис дьыала уорганнарын үлэһиттэрин оҕолоро, полицияттан ураты;

- Холуобунай-толорор систиэмэ уорганнарын үлэһиттэрин, Госпожнадзор баһаары утары үлэҕэ федеральнай сулууспатын, таможня уорганнарын уонна 283-ФЗ №-дээх федеральнай сокуон (30.12.2012) 3 ыст. 14-с чааһыгар ааттаммыт гражданнар оҕолоро.

Ордук бырааптаахтар

Судаарыстыбаннай уонна муниципальнай үөрэхтээһин тэрилтэлэригэр (тус сүүмэрдээһиннээх бырагыраамалартан ураты):

Оскуолаҕа убайдара уонна эдьиийдэрэ үөрэнэ сылдьар оҕолор, ол иһигэр приемнай дьиэ кэргэн эпиэкэтигэр эбэтэр попечительствотыгар буоллахтарына эмиэ.   

Ханнык докумуоннар ирдэнэллэрин Үөрэх управлениетын саайтыгар бу сигэнэн киирэн көрүөххүтүн сөп: https://yaguo.ru/node/15208

Үөрэх управлениетын Уопсай үөрэхтээһиҥҥэ салаатын аадырыһа: Лермонтов уулуссатын, 79, 101-с кэбиниэт

Сиһилии билсэр төл.: 507-309

Олорор сиргитинэн ханнык оскуолаҕа хапсаргытын бу QR-куодунан киирэн көрүөххүтүн сөп: