М.Е. Николаев аатынан куорат 40 №-дээх оскуолата арылынна!

Балаҕан ыйын 1 күнэ Дьокуускай куоракка өссө биир бэлиэ түгэнинэн өйдөнөн хаалла – 40 №-дээх М.Е. Николаев аатынан 990 миэстэлээх саҥа оскуола арылынна. 
Үөрүүлээх тэрээһиҥҥэ Ил Дархан Айсен Николаев уонна куорат баһылыга Евгений Григорьев кытыннылар.
Айсен Николаев Дьокуускай куорат биир саамай бөдөҥ оскуолата Бастакы Бэрэсидьиэн Михаил Николаев аатын сүгэрэ сүҥкэн суолталааҕын бэлиэтээтэ. 
«Михаил Ефимович үөрэхтээһини өйүүр боппуруостары куруук сөпкө туруорара. Дьокуускайга маннык оскуола баар буолбутуттан үөрэбин. Куорат дьаһалтатыгар биһиги көҕүлээһиммитин өйөөбүтүгэр уонна бу оскуолаҕа Михаил Ефимович Николаев аатын иҥэрбитигэр махтанабын», – диэтэ кини уонна СӨ Бастакы Бэрэсидьиэнэ Михаил Николаев аатынан оскуолалар тиһиктэрин тэрийэр туһунан ыйааҕы таһаарбытын иһитиннэрдэ.
Ил Дархан оскуола дириэктэрэ Галина Васильеваҕа БПЛА-ны үөрэтэр кабинет оборудованыгар сертификат туттарда.
Куорат баһылыга Евгений Григорьев саҥа оскуола кэлэктиибигэр хаачыстыбалаах үөрэҕи баҕарда уонна пищеблок оборудованиетыгар сертификат бэлэхтээтэ.
Оскуола дириэктэрэ Галина Васильева өрөспүүбүлүкэ уонна куорат салалталарыгар махталын биллэрэн туран, Бастакы Бэрэсидьиэн Михаил Николаев аатын чиэстээхтик сүгүөхпүт диэн эрэннэрдэ.
Бэлиэтээн эттэххэ, бүгүҥҥү күҥҥэ Саха сиригэр саамай бөдөҥ оскуоланы дойду баһылыга Владимир Путин көҕүлээбит «Үөрэхтээһин» национальнай бырайыагын иитинэн «ИФК «РФА-Инвест» хампаанньа тутта. Онон бу күн тутааччыларга «СӨ үтүөлээх тутааччыта» судаарыстыбаннай наҕараада, Ил Дархан Махтал суруктара туттарылыннылар. 
Оскуола боруогун быйыл 140 бастакы кылаас үөрэнээччитэ атыллаата, диэн Олохтоох дьаһалта пресс-сулууспата иһитиннэрэр. 
Санатар буоллахха, бүгүн, балаҕан ыйын 2 күнүгэр, Үөрэх адаптивнай комплексын 500 миэстэлээх саҥа дьиэтин үөрүүлээх быһыыга-майгыга арыйыы былааннанар.