Леван Горозия Дьокуускайын куруук ахтар

«Дельгей – Дьокуускай – Москва...

Сүүсчэкэ мас дьиэ уонна Өлүөнэ эбэ. Онтон салгыы барыта хара тыа. Балыктааһын. «Салют» бэлисипиэт.

Ол тухары биир санаа үүйэ-хаайа тутар. Оол көстөр кытыл анараа өттүгэр атын дойду, атын олох баар. Москва. Африка. Антарктида. Мин харахпар көстүбэт бүтүн планета. Интэриниэт суох. Кимтэн да ыйытар суох. Олорон эрэ бэйэҥ өйгөр эрэ оҥорон көр.

Тоҕус сааспар Дьокуускайга тиийэбит. 21 №-дээх оскуола. Богатырев уул., 4/1 олоробут. 300-чэкэ миэтэрэ тэйиччи Кыайыы болуоссата. Спорт саалата. Баскетбол, 202-с түөлбэҕэ күнү көрсүү.

Ол тухары эмиэ биир, үгүстэр билэр, бэйэҕит иитийэхтээбит санааҕыт – оскуолабын бүтэриэм даҕаны – мантан куотабын.

2005 сыллаахха «тэскилээбитим». Университеппын быраҕан, Москваҕа киирбитим уонна көспүтүм.

Улахан, билбэт куоратым. Харчы суох. Саарбахтааһын... Сыыһа дьаһанным, алҕаһаатым дуу?

... Сүүрбэ сыл ааспытын кэннэ үөрэ саныыбын – олохпор биир саамай сөптөөх быһаарыыны ылыммытым таһынан, ол миэхэ табылынна.

Эһиэхэ эмиэ оннук дуо?»

Маннык тыллары Леван куйаар ситимигэр тус страницатыгар суруйбут.

Грузин уонна нуучча хааннаах Леван бэйэтин саханан ааҕынарын, Саха сиригэр төннө турарын, улааппыт, куорсун анньыммыт, муусука эйгэтигэр бастакы хардыыларын оҥорбут Дьокуускайын туохтааҕар да таптыырын хаста да билинэн турар. 2022 сыллаахха СӨ үтүөлээх артыыһа Саина «Здравствуй, Якутск» уостан түспэт ырыатын Dipiphany бырайыагы кытта саҥалыы тыыннаан таһааран, Дьокуускай 390 сыллаах үбүлүөйүгэр соһуччу бэлэҕи оҥорбута. Ол иннинэ 2016 сыллаахха Саха АССР үтүөлээх артыыһа Наталья Трапезникова аан дойдуга аатырбыт «Якутяночка» ырыатын Варвара Визборы кытта бэйэлэрин көрүүлэринэн уратытык толорон, ыччат дьон биһирэбилин ылбыттара.

Арассыыйаҕа киэҥник биллэр рэпер L’One тапталлаах куоратыгар куруук сонун бырайыак кэһиилээх кэлэр. Бу иннинэ Дьокуускай төрөөбүт күнүгэр, «Муус устар» ыччат бэстибээлигэр кыттыбыта.  

Леван Дьокуускайын туһунан өрүү махтал тылларынан ахтарын үөрэ, долгуйа истэбит.