Үлэлээбэт биэнсийэлээх босхо айанныыр бырааптаах, өскөтүн...

Бу сылга киирэн баран Арассыыйа Социальнай пуондатын Саха сиринээҕи салаата 4,6 тыһыынчаттан тахса үлэлээбэт биэнсийэлээх сынньана барарыгар-кэлэригэр көрсүбүт ночоотун төлөспүт.  Бу манна 200 мөл. тахса солкуобай туттуллубут.

Билэргит курдук, итинник кэмпэнсээсийэни икки сылга биирдэ Уһук Хоту уонна онно тэҥнээх сирдэргэ олорор уонна кырдьаҕаһынан анаммыт страховой биэнсийэлэрин эбэтэр инбэлиитинэн биэнсийэлэрин ол сирдэриттэн ылар үлэлээбэт биэнсийэлээхтэр туһанар бырааптаахтар.

Онуоха биэнсийэлээхтэр кэмпэнсээссийэни туһаныы икки көрүҥүттэн биири талар бырааптаахтар. Бастакы барыйаан – олорор сирдэригэр баар СФР отделениетыгар эбэтэр МФЦ-га тиийэн, босхо айан билиэтин толотторорго анал толуону ылыы. Иккис барыйаан – айан билиэтин бастаан бэйэлэрэ төлөһөн ылаллар. Кэмпэнсээссийэтин кэлэн баран, айаннаабыт билиэттэригэр олоҕуран ылаллар.  

Айан ночоото сынньанарга ханнык тырааныспарынан айаннаабыккыттан тутулуга суох төлөнөр. Ити иһигэр бэйэ массыынатынан айан, пуойаһынан, көтөр аалынан эбэтэр оптуобуһунан айан эмиэ киирсэллэр. Сүрүнэ, итиннэ көрсөр ороскуотуҥ богуон плацкардыгар, дойду уонна ЕАЭС чилиэнэ дойдулар авиахампаанньаларын сөмөлүөтүнэн, куораттар икки ардыларыгар сылдьар оптуобустарынан, уу аалын III категориялаах каюталарыгар, ону таһынан муора суудунатын IV–V бөлөҕөр киирсэр каюталарыгар олорон айаннаабыттан үрдүк буолуо суохтаах.

Бэйэҥ массыынаҕынан айаннаабыт буоллаххына, тимир көлөҥ эн бас билиигэр баарын кэрэһилиир докумуонуҥ, айаныҥ тухары саппараапкалыыр ыстаансыйаларга тохтоон, уматык иһин төлөспүт чиэктэриҥ баар буолуохтаахтар. Ону таһынан ити эн айаннаабыт кэмҥэр, эн сынньаммыт сиргэр тиийэр айан сыанатын орто кээмэйин уонна төннөргө пуойас плацкардыгар айанныыр төлөбүр орто кээмэйин туһунан ыспыраапкалаах буолуохтааххын.  

Айан ороскуотун кэмпэнсээссийэлиири туруорсар сайабылыанньаны Судаарыстыбаннай өҥө порталыгар баар Тус кэбиниэттэн ыытыахха эбэтэр СФР Саха сиринээҕи отделениетын килийиэннэри кытта үлэлэһэр сулууспатыгар, эбэтэр МФЦгар сирэй тиийэн туттарыахха сөп. Сайабылыанньаны туттарбыт күҥҥүттэн 5 үлэ күнүн иһинэн көрөллөр. Кэмпэнсээссийэ биэнсийэҕин кытта тэҥҥэ төлөнөр.