«Үлэ киһитэ-2027» бириэмийэҕэ сайаапкалары хомуйуу саҕаланна

Ил Дархан 2023 сыл кулун тутар 7 күнүнээҕи  2798 №-дээх ыйааҕынан Саха Өрөспүүбүлүкэтигэр бу үрдүк ааты кытта 300 тыһ. солк. кээмэйдээх харчынан бириэмийэ сыл аайы 50 бастыҥ исписэлиискэ ананар. Сыала-соруга – Саха сирин сайдыытыгар олохторун анаабыт, бастыҥ үлэлээх дьону бэлиэтээһин, үлэһит киһи үрдүк аатын өрө тутуу.

Муус устар 30 күнүттэн үлэ уонна социальнай сайдыы министиэристибэтэ номнуо эһиилги бириэмийэҕэ сайаапкалары хомуйарын биллэрдэ.

Балаһыанньа быһыытынан, бириэмийэ кыайыылаахтарын быһаарыы үс түһүмэҕинэн ыытыллар – үлэ кэлэктиибэ, үлэ уонна социальнай сайдыы министиэристибэтэ / урбаан министиэристибэтэ, киирбит сайаапкалартан бастыҥнары талыы.

Сайаапкалары тутар аадырыс: Үлэ уонна социальнай сайдыы министиэристибэтэ, 677000, Дьокуускай к., Петр Алексеев уул., 6/1, 314 каб. Төл.: 8(4112) 508-075, 8(4112) 508-069; электроннай почта: https://mintrud.sakha.gov.ru

Үлэ, Саас, Маай бырааһынньыгар сөп түбэһиннэрэн үлэ дьонун чиэстииртэн ордук туох баар буолуой?! Улахан да, кыра да тэрээһиннэргэ Сахабыт сирин сүрүн баайа, киэн туттуута – үлэһит норуота диэн дорҕоонноохтук этэбит. 2023 сылтан аны анал бириэмийэ туттарыллар буолбута – үлэ киһитигэр сүҥкэннээхэй болҕомто бэлиэтэ.

Билэрбит курдук, Саха сиригэр 34 улуус уонна 2 куорат уокуруга, ол эбэтэр 36 муниципальнай тэриллии баар. Быйыл «Үлэ киһитэ-2026» бириэмийэни туппут 50 киһиттэн 22-тэ – Дьокуускай куораттан, ону кытта 14 улуустан бииртэн түөркэ диэри бэрэстэбиитэл. Биллэн турар, бу бары үлэҕэ уһулуччу үрдүк көрдөрүүнү ситиспит дьон. Онон үлэлэрэ дьоһуннук сыаналаммытынан эҕэрдэлиибит!

Онон эһиил хаалбыт 19 муниципальнай тэриллии эмиэ дьоннорун чиэстиир-бочуоттуур туһугар күүскэ үлэлэһиэхтэрин, итини болҕомтоҕо ылыахтарын наада. Балаһыанньа быһыытынан бириэмийэҕэ үлэ кэлэктииптэрэ, муниципалитеттар түһэрэллэр.