“Үлэ киһитэ-2026” үрдүк аат – Дьокуускайтан 22 киһиэхэ!

Ил Дархан Айсен Николаев 2023 сыллааҕы анал ыйааҕар олоҕуран, бу үрдүк аат хас сыл аайы өрөспүүбүлүкэ 50 бастыҥ үлэлээх олохтооҕор ананар. Хас биирдии кыайыылаахха 300 тыһ. солк. ананар. Сыала-соруга – Саха сирин сайдыытыгар олохторун анаабыт, бастыҥ үлэлээх дьону бэлиэтээһин, үлэһит үрдүк аатын өрө тутуу.

Быйылгы кыайыылаахтары көрдөххө, бу үрдүк аат анаммыт дьонуттан баһыйар өттө – 22 киһи – Дьокуускай куоракка үлэлиир. Алдан, Мииринэй оройуоннарыттан – түөртүү, Мэҥэ Хаҥаластан – 3, Бүлүү, Эдьигээн, Ньурба, Өлүөхүмэ, Хаҥалас уонна Чурапчы улуустарыттан – иккилии, Булуҥ, Нам, Таатта, Томпо уонна Уус Алдан оройуоннарыттан – биирдии бэрэстэбиитэл баар.

Министиэристибэлэр, биэдэмэстибэлэр хадатаайыстыбаларынан эмиэ ананар. Ол курдук, кыайыылаахтар ортолоругар Доруобуйа харыстабылын, бырамыысыланнас, Тыа хаһаайыстыбатын уонна Үлэ министиэристибэлэриттэн – 5-тии лауреат баар. Култуура уонна Үөрэх министиэристибэлэриттэн – 4-түү киһи, ДьУоХХ, Гражданскай оборуона министиэристибэлэриттэн уонна Бэтэринээр управлениетыттан – 3-түү, Инновация, сибээс, Спорт,  Култуура, Тырааныспар, Экология министиэристибэлэриттэн – иккилии, Тутуу, Үп, Экэниэмикэ министиэристибэлэриттэн – биирдии бастыҥ үлэлээх баар.

Саастарынан көрөр буоллахха, муҥутуур эдэр саастаахтара -48-таах, үгүстэрэ 60-нарыттан үөһэ саастаахтар. Кыайыылаахтар ортолоругар, чахчыта да, үтүмэн үгүс сылларын үлэҕэ анаабыттар бааллар. Ол иһигэр сөрү диэн сөҕүөх иһин, 3 кыайыылаах – 89 саастарыгар сылдьар ытык дьон.

Идэлэринэн араардахха, араас эйгэттэн бааллар: холобур, балыксыт, бааһынай хаһаайыстыбалаах, бэтэринээр, быраас, сиэстэрэ, баһаарынай, учуутал, преподаватель, тириэньэр, маастар, эпэрээтэр, урбаанньыт, дирижер, инженер, иитээччи, машинист, оркестр салайааччыта, сэбиэдиссэй, лүөччүк-наблюдатель, археограф.