«Үлэ киһитэ-2025» лауреаттара чиэстэннилэр

Өрөспүүбүлүкэ Ил Дарханын быйыл үһүс сылын туттарыллыбыт «Үлэ киһитэ» бириэмийэтин лауреаттарын ортотугар норуот хаһаайыстыбатын араас салааларыттан бастыҥтан бастыҥнар киирэллэр – учууталлар, тыа хаһаайыстыбатын уонна промышленнас эйгэтин, социальнай уонна доруобуйа харыстабылын үлэһиттэрэ, култуура уонна спорт үлэһиттэрэ. 

Ил Дархан Айсен Николаев сыллата лауреттарга, өрөспүүбүлүкэ уонна дойду сайдыыларыгар киллэрэр уһулуччулаах кылааттарын иһин, 300 тыһ. солк. кээмэйдээх бириэмийэлэри туттарар.

Ол курук, быйылгы куонкуруска 315 сайаапка киирбититтэн Саха Өрөспүүбүлүкэтин бырабыыталыстыбатын хамыыһыйатынан бириэмийэҕэ талыллыбыт 50 лауреат ортотугар спорт эйгэтин үс үлэһитэ баар.

Манчаары аатынан Спорт национальнай көрүҥнэрин киинин гиирэ спордугар тренерэ, Саха Өрөспүүбүлүкэтин үтүөлээх тренерэ Василий Николаевич Дьячковскай:

– Ааспыт сыл эрэ түмүгэ буолбатах, өр сылларга тренердээбит, гиирэ федерациятын салайан кэлбит үлэбин үрдүктүк сыаналааһын дии саныыбын. Быйыл бириэмийэни бары сааһырбыт, уһуннук үлэлээбит, уопуттаах дьон ыллылар. Үлэлээбитим былаһын тухары 20-чэ Арассыыйа маастарын, икки норуоттар икки ардыларынааҕы кылаастаах спорт маастарын, 20-чэ Саха сирин маастарын иитэн-бэлэмнээн таһаардым. 1985 сылтан гиирэ спордун федерациятын салайан кэллим. Билигин оҕолордуун, улахан дьоннуун 800-кэ киһи сөбүлээн дьарыктанааччылар, 10 тренер баарынан киэн туттабын. Үгүстэр дьиэлэнэн-уоттанан, хамнастанан олороллор. Гиирэ спорда сүрдээҕин сайынна, балачча ситиһиилэрдээхпит. Бастыҥ иитиллээччилэрим – аан дойду, Европа, Арассыыйа чөмпүйүөнэ, норуоттар икки ардыларынааҕы кылаастаах спорт маастара Михаил Саввинов, Арассыыйа призера Дмитрий Михалев, аан дойду, Арассыыйа призера Владимир Оленов, аан дойду Кубогын кыайыылааҕа Елена Иванова – Арассыыйаны  үрдүк чыпчаалга таһаарбыттара, ону сэргэ өрөспүүбүлүкэ чөмпүйүөннэрэ, призердара элбэхтэр. Санкт-Петербурга буолар аан дойду Кубогын түһүмэҕэр бараары сылдьабыт.  Илии тутуурдаах кэлбит киһи диэн сыаллаахпыт-соруктаахпыт. Гиирэ спорда оҕону-ыччаты иитиигэ олус туһалаах, улаханнык биһирэнэр, киэҥник тарҕаммыт көрүҥ, өссө күүскэ таһаарыахпыт.

Доруобуйаларынан хааччахтаах, адаптивнай физическэй култуура уонна спорт киинин методист-инструктора, аҕыйах хонугунан үбүлүөйдээх 85 сааһын бэлиэтээри сылдьар Маргарита Григорьевна Куличкина:

– 63 сылы спорка анаан кэллим. Ол иһигэр оскуолаҕа физкултуура учууталынан, Бүлүү оройуонун спорка кэмитиэтин, чэгиэн-чэбдик кулуубу салайан, барыларыгар 20-лии сыл курдук үлэлиибин. Ол тухары элбэх күрэхтэһии, турнир, чемпионат ыытылынна, олортон Манчаары оонньуулара, Олоҥхо ыһыаҕын оонньуулара курдук өрөспүүбүлүкэ таһымнаах улахан дьаһаллар бааллар. Иитиллээччилэрбиттэн үгүс көлүөнэ учууталлар, тренердэр, чөмпүйүөннэр, маастардар, салайааччылар таҕыстылар. Үгүстэр бүгүн миигин кытта тэҥҥэ үөрсэн эҕэрдэлээтилэр, ахта-саныы сылдьалларыттан, ытыктыылларыттан долгуйдум, олус үөрдүм. Билигин Дьокуускай куорат «Самородок» спорткомплексын саалатыгар дьахталларга хамсаныылары, «Кыайыы болуоссатыгар» сарсыардааҥҥы сэрээккэлэри оҥорторобун. Астыныыны, дуоһуйууну ылабын. Таах олорумаҥ, хамсана-имсэнэ сылдьыҥ. Үлэлээҥ, чэгиэн буолуҥ!

Нь.С. Тимофеев аатынан Нам олимпийскай солбук оҕо спорт оскуолатын дуобакка тренерэ, Саха Өрөспүүбүлүкэтин үтүөлээх тренерэ Василий Васильевич Куприянов:

– Үөрүү улахан, тустуу маастара Василий Винокуров дириэктэрдээх бииргэ үлэлиир спорт оскуолам кэлэктиибигэр, төрөөбүт-үөскээбит Мэҥэ Хаҥалас Мэлдьэхситигэр, дьиэ кэргэммэр махтанабын! 1969 сылтан үлэм түмүгэ дии саныыбын. 72 сааспар диэри үлэлии сылдьабын. Дуобаччыттарым ситиһиилэрэ үрдүк наҕараадаҕа аҕалла. Үүнэр-көлүөнэ ыччат кыайыы, ситиһии кирбиитин үрдэтэн иһэр. Бастыҥ иитиллээччилэрим ортолоругар аан дойду элбэх төгүллээх чөмпүйүөнэ Гаврил Колесов, Саха Өрөспүүбүлүкэтин үтүөлээх тренерэ Николай Николаевич Кычкин -II, «100 харахтаах» дуобакка оҕолорго Арассыыйа чөмпүйүөнэ, улахан дьоҥҥо Арассыыйа боруонса медалиһа, 11 кыл. үөрэнээччитэ Прокопий Говоров уо.д.а. бааллар Дуобаты таптааҥ, дьарыктаныҥ!

«Үлэ киһитэ-2025» бириэмийэ спорт эйгэтигэр лауреаттарын эҕэрдэлиибит, үөрүүлэрин үллэстэбит, аны да айымньылаахтык, таһаарыылаахтык үлэлииллэригэр, кытаанах чэгиэн туругу баҕарабыт!