Үлэ харыстабылын үлэһиттэрэ күрэхтэстилэр

Муус устар 11 күнүгэр Дьокуускайдааҕы энергетика үөрэтэр-производственнай киинигэр "Үлэ харыстабылын бастыҥ исписэлииһэ" куонкурус иккис практическай чааһа, маны сэргэ тэрилтэлэр производственнай салааларын үлэ харыстабылын үлэһиттэригэр аналлаах "Үрдүк сиргэ үлэлииргэ куттал суох буолуута" тренинг-сэминээр ыытылыннылар. Бу туһунан Дьокуускай уокуруктааҕы дьаһалтатын үлэ харыстабылыгар салаата иһитиннэрдэ.
Бу тэрээһин бэйэлэрин идэлэрин баһылаабыт, үөрүйэхтэрин, билиилэрин хаҥатарга дьулуурдаах дьону түмэр түһүлгэнэн буолла. Оттон тэрээһини уопуттаах үөрэх маастара Альберт Тимофеев иилээн-саҕалаан ыытта.

Куонкурус ирдэбилинэн куттал суох буолуутун хааччыйарга кыттааччылар үрдүк сиргэ үлэлииргэ сөптөөх спецтаҥастаах кэллилэр. Бырагыраама хас даҕаны тутаах түһүмэхтэн турда: 
Теория чааһа: кыттааччылар сыһыары ууруу кирилиэһи уонна стремянканы туһанан үрдүк сиргэ үлэни тэрийиини үөрэттилэр. Бу үрдүк сиргэ араас соруктаах ыытыллар үлэни толорорго куттал суох буолуутун хааччыйыы биир сүрүн сатабыла буолар.
Тургутуу чааһа: кыттааччылар "Үрдүк сиргэ куттал суох буолуутун хааччыйыы" тиэмэҕэ билиилэрин тургуттулар.

Практическай үлэ: күрэс былдьаһааччылар полигоҥҥа тахсан көмүскэнэр средстволары туһанан үрдүк сиргэ үлэлээн үөрүйэхтэрин, билиилэрин көрдөрдүлэр.
Үөрэтэр киин исписэлиистэрэ куонкурус кыттааччылара олус көхтөөхтөрүн, саҥаны билэргэ интэриэстээхтэрин, билбиттэрин-көрбүттэрин дьиҥ үлэҕэ туһанарга бэлэмнэрин бэлиэтээтилэр.
"Үлэ харыстабылын бастыҥ исписэлииһэ" куонкурус үлэ миэстэтигэр куттал суох буолуутун тиэмэтигэр болҕомтону тардан сылтан сыл кыттааччыта элбээн иһэрэ үөрдэр.
Маннык хабааннаах тэрээһиннэр араас салаа үлэһиттэрин үлэҕэ эппиэтинэстэрин, идэтийиилэрин таһымнарын үрдэтэргэ көмөлөөхтөрө саарбаҕа суох.