Үлэ хаамыытын бэрэбиэркэлииллэр

Бэс ыйын 6 күнүгэр куорат баһылыгын солбуйааччы Антон Алексеенко тупсарыы үлэтэ, хапытаалынай өрөмүөн ыытылла турар эбийиэктэрин бэрэбиэркэлээтэ.

Ол курдук, баһылык солбуйааччыта Короленко уулуссатыгар турар Саха-корейскай оскуолаҕа уонна Дзержинскэй уулуссатыгар 16 №-дээх оскуолаҕа тиийэн, үлэ хаамыытын билистэ. Ону сэргэ, куорат таһынааҕы «Спутник» лааҕырыгар сырытта, манна даҕатан эттэххэ, бу эбийиэк тиэргэнэ тупсарылла турар.

Бэс ыйын 6 күнүнээҕи туругунан оскуолаларга көтүрүү үлэтэ түмүктэммит. Инженернэй ситими таҥарга бэлэмнэнии бара турар. Антон Алексеенко иһитиннэрбитинэн, графиктан хаалыы суох, бэдэрээтчит маннык өрөмүөҥҥэ уопуттаах, онон үлэни кэмигэр түмүктүүрүгэр эрэл улахан.

Баһылык солбуйааччыта эппитинэн, эбийиэктэр болдьохторугар киирэллэрин туһугар маннык бэрэбиэркэлэр тиһигин быспакка буолуохтара.

Салгыы куорат баһылыгын солбуйааччы Рыдзинскай уул., 18/2, 18/13, 18/14 нүөмэрдээх дьиэлэр тиэргэннэригэр хапытаалынай өрөмүөн хаамыытын тиийэн көрдө.

«Быйыл 15 тиэргэн тупсарыллара былааннанар. Бүгүн сылдьыбыт эбийиэктэрбитигэр бэдэрээтчиттэр үлэлии тахсыбыттар. Ааһар суоллары уонна былаһааккалары көтүрэ сылдьаллар. Оҕо уонна спорт былаһааккаларыгар дьоҕус архитектурнай формалары хаһан сакаастыылларын чуолкайдаатыбыт. Бу эбийиэктэри эмиэ хонтуруолга ылыахпыт. Тутуу кэмэ бэрт кылгас, үлэ күн-дьыл туруга үчүгэй эрдэҕинэ түмүктэнэрин ситиһиэхтээхпит», – диэтэ  баһылык солбуйааччыта.

Маны таһынан, бу иннинээҕи сылларга өрөмүөннэммит тиэргэннэри бэрэбиэркэлээтилэр. Антон Алексеенко эппитинэн, бэдэрээтчиттэр бэс ыйын 20 күнүгэр диэри ыйыллыбыт итэҕэстэри туоратыахтаахтар. Билигин муниципальнай сакаасчыт үлэ хаамыытын кыраҕытык кэтээн көрөр, хонтуруоллуур.