Үлэ бэтэрээнигэр оптуобуһунан айаҥҥа ыйга 634 солк. көрүллүөҕэ

Саха Өрөспүүбүлүкэтигэр үлэ бэтэрээннэригэр хас да  көрүҥ харчынан эбии төлөбүр көрүллэр.

Ол курдук, 50 саастарын туолбут дьахталларга уонна 55 саастарын туолбут эр дьоҥҥо, үлэлииллэриттэн-үлэлээбэттэриттэн тутулуга суох, ыйга 1370 солк. кээмэйдээх харчынан төлөбүр оҥоһуллар. Маны сэргэ ОДьКХ өҥөтүн төлөбүрүгэр ыйга 1604 солк. кээмэйдээх компенсация оҥоһуллар. ОДьКХ төлөбүрэ бу сууманы куоһарар түгэнигэр, МФЦ эбэтэр судаарыстыбаннай уонна муниципальнай өҥө порталын нөҥүө хаттаан аахтарыыга сайабылыанньа биэриэххэ сөп.

Үлэ бэтэрээннэрэ маны сэргэ уопсастыбаннай тырааныспарынан айанныырга чэпчэтиинэн туһаналлар. 2026 сылга бу сыалга үлэ бэтэрээннэригэр ый аайы 634 солк. көрүлүннэ (2025 сылга – 598 солк.).

Санатар буоллахха, 2026 сыл тохсунньу 1 күнүттэн куорат оптуобустарынан айан төлөбүрэ уу харчынан 58 солк. буолаары турар.