"Өлбөт үйэлээх полк" аахсыйа сирэй көрүҥүнэн ыытыллыа

Кыайыы 80 сылыгар "Өлбөт үйэлээх полк" аахсыйа сирэй көрүҥүнэн ыытыллыа. Ол курдук, нэһилиэнньэлээх пууннарга Кыайыы күнүгэр Аҕа дойду Улуу сэриитин кыттыылаахтарын мэтириэттэрин тутан сэлэлии хаамыы тэриллиэ. Маннык быһаарыыны муус устар 14 күнүгэр СӨ Ил Дархана Айсен Николаев ыыппыт сүбэ мунньаҕар ылыннылар. Ил Дархан сэрии кыттыылаахтарын хорсун быһыыларын кэриэстиир, кинилэргэ махталы биллэрэр үйэлээх өйдөбүл хаамыытын үрдүк таһымҥа тэрийэри сорудахтаата. "Биһиэхэ, дойдубут үрдүнэн барытыгар курдук, Аҕа дойду Улуу сэриитэ хас биирдии дьиэ кэргэни хаарыйбыта. Хас биирдии дьиэҕэ бу сэрии дьоруойдарын туһунан өйдөбүл баар. "Өлбөт үйэлээх полк" хаамыытын өрөспүүбүлүкэ олохтоохторо сааһыттан, омугуттан, бэлиитикэҕэ көрүүтүттэн тутулуга суох өрүү өйүүллэр", – диэн бэлиэтээн эттэ Айсен Николаев.
Санатар буоллахха, Саха сиригэр бу аахсыйа бастакытын 2013 с. ыытыллыбыта.

 Хаартыска: Ил Дархан телеграм-каналыттан