«Өлүөнэ очуостара» национальнай пааркаҕа ойуурга сылдьары боптулар

Ойуур баһаардарын таһаарбат уонна ураты айылҕаны харыстыыр сыалтан, паарка дьаһалтата от ыйын 2 күнүттэн ураты дьаһал тахсыар диэри, гражданнар ойуурга сылдьалларын уонна ханнык баҕарар тырааныспар ойуур сиригэр киирэрин быстах кэмҥэ бопто.

Пааркаҕа сынньаныы хааччахтаах эрээри, син биир кыаллар. Буотама өрүскэ баар ыалдьыттар дьиэлэрэ штатнай эрэсииминэн үлэлиир — анал дьиэлэргэ кэлэн, бириэмэни табыгастаахтык атаарыахха сөп, манна куттала суох сынньанарга бары усулуобуйа тэриллибит. Ол эрэн аналлаах зоналар тас өттүлэригэр балаакканан сынньаныы быстах кэмҥэ бобуллар. Ойуур маассаларыгар киирии кытаанахтык хааччахтанар, тоҕо диэтэххэ, кыра да кыымтан алҕас алдьархай тахсыан сөп.

Паарка дьаһалтата быһыы-майгы тупсарын кытта хааччахтары устар туһунан иһитиннэриэхпит диэн эрэннэрдэ. Ыалдьыттартан бу миэрэлэри өйдүүллэригэр көрдөһөллөр уонна айылҕаны харыстыырга ыҥыраллар.