Өлүөнэ эбэҕэ Өлүөхүмэ оройуонугар муус хамсааһына саҕаланна

Бүгүн сарсыарда 08.00 чаастааҕы туругунан, өрөспүүбүлүкэ өрүстэригэр уу таһыма үрдээһинэ, кутталлаах гидрологическай көстүүлэр бэлиэтэммэтилэр. Бу туһунан брифиҥҥэ «Саха сиринээҕи гидрометеорология уонна тулалыыр эйгэни кэтээн көрөр управление» ФГБУ начаалынньыга Людмила Мурашко иһитиннэрдэ.

«Бэҕэһээ киэһэ Хатыҥ Тумул сэлиэнньэтин анныгар кылгас кэмнээх муус харыыта бэлиэтэммитэ, түүн харыы бэйэтэ алдьаммыта. Бүгүн сарсыарда муус хамсааһына Хаҥалас улууһугар тиийдэ, Покровскай куорат таһыгар муус хамсааһына саҕаланыа диэн күүтэбит. Табаҕа – Дьокуускай учаастагар муус хамсааһына ыам ыйын 16 күнүгэр, нуорматтан икки хонук эрдэлээн, күүтүллэр. Дьокуускай куорат таһыгар сааскы халаан уутун муҥутуур таһыма үрдээтэҕинэ, Күөх Хонуу уонна Даркылаах түөлбэ сирдэрэ ууга барыахтарын сөп», – диэтэ кини.

Нам уонна Уус Алдан оройуоннарыгар Өлүөнэ эбэҕэ муус устуута ыам ыйын 17–19 күннэригэр күүтүллэр. Алдан эбэҕэ муус устуута Алдан, Уус Маайа уонна Томпо оройуоннарыгар салҕанар. Чугастааҕы икки сууккаҕа муус салгыы устан Уус Алдан оройуонугар бэлиэтэниэҕэ.

Бүлүү эбэҕэ муус алын тардыыта Бүлүү куорат аннынан баар, чугастааҕы кэмҥэ, бүгүн, Кэбээйи оройуонугар баар Хатырык-Хомо метеостанция таһыгар өрүс эстэрэ күүтүллэр. Алдан уонна Бүлүү өрүстэр эстиилэрэ, Өлүөнэ эбэҕэ тахсыыта ыам ыйын 16–18 күннэригэр күүтүллэр.

Халыма эбэҕэ Зырянка бөһүөлэк таһыгар муус устуута ыам ыйын 19–21 күннэригэр, нуорманы иһинэн, күүтүллэр. Өрүс эстэригэр муус харыыта үөскүөн уонна уу таһыма кутталлаах бэлиэттэн үрдүөн сөп.

Өлүөнэ эбэ алын сүүрүгэр, ону тэҥэ Анаабыр, Өлөөн, Дьааҥы, Индигиир уонна Алаһыай өрүстэргэ өссө да муус турар, уу мууска тахсара бэлиэтэнэр.