Өлүөхүмэ улууһа хаһыаты-сурунаалы сурутууга – инники!

Бу туһунан эрэдээксийэҕэ Арассыыйа почтатын Приморье кыраайын, Новосибирскай уобалас УФПС-тарын уонна атын салаа тэрилтэлэрин тас коммуникация хайысхатыгар салайааччыта Татьяна Глаголева иһитиннэрии ыытта.

Суруйуутун “Хаһыакка сурутуу күүрээнэ: Саха сиригэр хаһыаты ордук ханна суруталларый?” диэн төбөлөөбүт.

2026 сыл бастакы аҥаарыгар сурутуу түмүгүнэн ордук көхтөөх сурутааччыларынан Өлүөхүмэ улууһа буолбут. Кырдьыгынан эттэххэ, омос көрүүгэ соһуччу соҕус түмүк диэххэ наада. Ол гынан баран кинилэр нэһилиэк, куорат уопсай ахсааныгар сурутуу ахсаанын түҥэтэн таһаарар ньымаларын түмүгэ баар чахчыны көрдөрдөҕө. Оттон уонна нууччалыы-сахалыы таһаарыы барыта учуоттаннаҕа.

Ол курдук, улуус 1000 олохтооҕор тиксэринэн, Өлүөхүмэ улууһугар 80 кэмпилиэк кумааҕы таһаарыыга суруппуттар. Иккис миэстэҕэ Таатта улууһа (почтовайынан Ытык Күөл  диэбиттэр) сылдьар. Бу манна 1000 нэһилиэнньэҕэ 65 таһаарыы тиксибит. Үһүс бочуоттаах миэстэҕэ 1000 киһитигэр тиксэринэн 54 таһаарыыны суруппут Сунтаар улууһа сылдьар.
Эҕэрдэлиибит!

Саха сиригэр бу сыл бастакы аҥаарыгар, сэрэйиллэрин да курдук, сурутуу баһыйар өлүүскэтин өрөспүүбүлүкэ таһаарыылара ылбыттар. Муҥутуур элбэх сурутуу “Кыымҥа” буолбут, ол кэнниттэн “Саха сирэ” уонна “Забота-Арчы” сылдьаллар. Ону кытта тэҥинэн оройуон, улуус хаһыаттара дьоһуннаах миэстэни ылаллара бэлиэтэммит. Чуолаан хаһыаттартан “Олёкма”, “Сунтаар сонуннара”, «Үлэ күүһэ”, «Олох суола» уонна оҕо сурунаалларыттан “Чуораанчык” уонна  “Колокольчик+” киирбиттэр. Бу улуустар хаһыаттара элбэх сурутааччылаахтар эбит.

Салгыы Татьяна Глаголева Саха сирин олохтоохторо ыраахтан олорон сурутууну – Арассыыйа почтатын мобильнай сыһыарыытын уонна саайтын туһанан – көхтөөхтүк суруппуттарын анаан бэлиэтээбит. Былырыын от ыйыттан саҕалаан ахсынньыга диэри кэмҥэ кумааҕы пресса сүгүрүйээччилэрэ 18 804 хаһыат уонна сурунаал кэмпилиэгин суруппуттар.

Дьэ, ити курдук, кумааҕы хаһыакка-сурунаалга, төһө да олус уустук кэм бүрүүкээбитин, уруккуга холоотоххо тираж биллэ-көстө түспүтүн, бэл, сорохтор сабылларга күһэллибиппит иһин, ааҕары сөбүлүүр өрөспүүбүлүкэбит үтүө аата билигин да киэҥ сирдэринэн иһиллэ, холобур буола олороро үөрдэр. Биир идэлээхтэрбитигэр ис сүрэхпититтэн ситиһиилэри баҕарабыт! Чуолаан ийэбит үүтүн кытта тэҥинэн иҥэриммит тапталлаах сахабыт тылынан тахсар хаһыат-сурунаал симэлийэри билбэккэ, көхтөөх ааҕааччыларын көмөтүнэн салгыы сайдан иһиэхтин!