Кыыс оҕо тириитин хайдах көрүнүөхтээҕий?

Сирэй тириитин уларыйыыта 
12-14 саастан саҕалаан тирии тас көстүүтэ сыыйа уларыйар: сыаланар, онтон тирии тутула хоччорхой буолар. Сыата суох кураанах тириилээх киһиэхэ бу уларыйыылар биллиэ суохтарын сөп. 
Тирии уларыйыытын саамай хомолтолооҕо – хара туочука, акне (угревая болезнь) буолар. Статистика көрдөрөрүнэн, 80% эрдэҕэс оҕолор ууһатар уорганнара сайдар кэмигэр бу кыһалҕаны көрсөллөр. Сыыһа эмтэнииттэн, сөбө суох көрүнүүттэн акне өр сылларга сүтүө суоҕун сөп. 

Хара туочука, хатаал тахсыытын биричиинэлэрэ 
Генетика 
Генетикаттан киһи этин-сиинин көмүскүүр уонна бэрээдэктиир систиэмэ  үлэтэ улахан тутулуктаах. Систиэмэ үлэтин кэһиллиитин түмүгэр акне тахсар.
Бактерия
«Propionibacterium acnes» бактерия элбээн, сыа былчархайдарын бүөлүүр.
Фолликуллар
Фолликулярнай ханаал кэһиллиитэ.
Гормон
Эрдэҕэс саастаах оҕо хааныгар андроген (эр киһи гормона) мунньуллуута үрдүүр, оччоҕо сыа былчархайдара (сальные железы) улаатан биэрэн, тирии сыатын элбэтэллэр.

Эдэр тириини көрүнүү сүрүн быраабылалара
- Сирэй тириитин уратыларынан көрөн, хаачыстыбалаах сирэй суунар тонигы, кириэми, косметиканы туһаныы буолар;
- Тириини күүстээх күн сардаҥаларыттан харыстааһын;
- Сөптөөх битэмииннээх аһы-үөлү, чөл олоҕу тутуһуу;
- Кыһалҕалаах буоллахха, анал үөрэхтээх исписэлиистэргэ, быраастарга көрдөрүү.

Кыыс хас сааһыттан косметологка сылдьыахтааҕый?
Хас биирдии киһи тириитин тутула ураты буолар. Холобур, хара туочука, хатаал, акне куруук тахсар, тирии кытарар  уонна сүһүрэр буоллаҕына, тута косметологка сөптөөх сүбэни ыла кэлиэхтээхин.
Кэрэ аҥаардар 25 саастарын кэнниттэн косметологическай эмтэнии, сөптөөх көрүнүү булгуччулаах буолуохтаах. Тириини, чуолаан сирэй тириитин, төһөнөн эрдэ көрүнэҕин, соччонон эн тупсуоҥ.