Кыыллар приюттара кыстыкка бэлэмнэнэр

Киин куорат баһылыга Дмитрий Садовников «Помоги выжить» хаһаайына суох кыыллар приюттарыгар сырытта. Кини МАХ ханаалыгар манна кыстыкка бэлэмнэнии буола турарын, онуоха ыттар турар вольердарын бүрүйэргэ эргэ көбүөрдэр наадаларын иһитиннэрдэ. Очиченко уулуссатыгар турар «Помоги выжить» приюкка илдьэн биэриэххитин эбэтэр пуонда дириэктэрэ Екатерина Рукавишникова +7 924 599-76-60 нүөмэригэр эрийиэххитин сөп.

Бэлиэтээн эттэххэ, эбийиэк 2020 сыллаахха аһыллыбыта, коммерческайа суох тэрилтэҕэ бэриллибитэ, 2022 сылтан приют статуһун ылбыта.

Сыл саҕаланыаҕыттан приюкка 1073 ыт хараллыбыт. Олортон 41 ыты куорат олохтоохторо – бэйэлэрэ, атыттарын бэдэрээтчиттэр, управалар уонна тэрилтэлэр тутан аҕалбыттар. 131 кыылы хаһаайыннарыгар төннөрбүттэр.

Дмитрий Садовников күһүн кэлиитэ көрүүтэ-истиитэ суох ыт ахсаана үгэс курдук элбиирин бэлиэтээн туран, бэдэрээтчит тэрилтэлэргэ хонтуруол күүһүрдүллүөҕүн уонна саҥа толорооччулары буларга үлэ ыытыллыаҕын иһитиннэрдэ.