Кыыһы кытта билсээри, 440 тыһ. солк. мэлиппит

Дьокуускай куорат полициятын дьуһуурунай чааһыгар 20 саастаах олохтоох киһи сайабылыанньа суруйбут. Эдэр киһи дистанционнай түөкүттэргэ киирэн биэрбит.

Ол курдук, билсиһии сыһыарыытыгар Елизавета диэн кыыстыын билсибит. Кылгас кэмҥэ суруйсан баран, тыйаатырга барарга сүбэлэспиттэр. «Елизавета» тыйаатырга сылдьарга уонна билиэт атыылаһарга QR-коду ыыппыт. Эдэр киһи, саҥа билсибит кыыһын көрөөрү, хас да төгүл харчы ыыппыт, ол эрээри систиэмэ хас сырыы аайы алҕас тахсыбытын курдук көрдөрбүт. Түмүгэр, ыытыллыбыт харчы уопсай суумата 440 тыһыынча солкуобайга тиийбит. Онтон эрэ кинини албыннаабыттарын өйдөөн, уол тыйаатыр оннугар полицияҕа барбыт.

Полиция гражданнары сэрэтэр: билбэт дьоҥҥутугар харчы ыытымаҥ, ким да буоллун, ханнык да сигэлэри уонна QR-кодтары ыыттын, арыйымаҥ. Интэриниэккэ харчы эпэрээссийэтин оҥорорго сэрэхтээх буолуҥ.