Кытаанах бөҕү тиэйтэрии туһунан тугу билэҕин?

Кытаанах бөҕү-сыыһы тиэйтэрии иһин төлөбүр хас биирдии куорат олохтооҕор сыһыаннаах. «Киин куорат» ааҕааччыларын ыйытыыларыгар «Якутскэкосети» регионнааҕы оператор сүрүн исписэлииһэ Ирина Горлатова хоруйдуур.

– Чааһынай дьиэҕэ олорор ыал бөх тиэйтэрэргэ дуогабар түһэрсиэхтээх дуо? Ханна тиийэн дуогабардаһарый?

– Чааһынай дьон региональнай оператордыын кумааҕыга дуогабар түһэрсэллэрэ булгуччута суох. Сокуоҥҥа олоҕуран, дуогабар быһалыы (публичная оферта) быһыытынан түһэрсиллэр.

Сокуон быһыытынан, кытаанах бөҕү таһаарар хас биирдии юридическэй сирэй уонна урбаанньыт региональнай операторы кытта дуогабар түһэрсиэхтээх.
Дьокуускай куоракка үлэлиир «Якутскэкосети» региональнай оператор аадырыһа: Октябрьскай уул., 11, 8984-100-15-64. Официальнай сайта: https://yakutskecoseti.ru/yuridicheskim-litsam/ 

– Чааһынай дьиэҕэ төлөбүр хайдах ааҕылларый?

– РФ Бырабыыталыстыбатын 354 №-дээх уурааҕыгар олоҕуран («Правила о предоставлении коммунальных услуг собственникам и пользователям помещений в многоквартирных домах и жилых домов»), төлөбүр икки көрүҥүнэн ааҕыллар: дьиэҕэ олорор дьон ахсаанынан эбэтэр дьиэ иэнинэн. Ону регион былааһа бэйэтэ талар. Төлөбүр олорор дьон ахсаанынан буоллаҕына, пропискалаах эрэ дьон буолбакка, кылгас кэм олорооччулар эмиэ ааҕыллаллар. Дьиэҕэ биир да киһи прописката суох буоллаҕына,  төлөбүр дьиэни бас билээччилэртэн ылыллар.

– Бөх хомуйар былаһааккалартан оту-маһы, массыына көлөһөлөрүн, дьиэ өрөмүөнүн кэнниттэн быраҕыллыбыт малы-салы тоҕо ылбаккытый?

– Кытаанах бөх-сыыс (ТБО) – дьон дьиэтин иһигэр оҥорон таһаарар сыыһа. Холобур, ас хаата, туһаттан тахсыбыт мал, алдьаммыт миэбэл, тутуу матырыйаала, үүнээйи уга (оҕуруот аһын уктара), дьиэ кыылыттан тахсар сыыс, массыына саппаас чааһа кытаанах бөххө киирбэттэр. Ол иһин региональнай оператор тарыыбыгар киирбэт, таспат.

– Санитарнай былаһаакка турар миэстэтин ким быһаарарый? Сорох дьиэлэртэн олус ыраах турар.

– Элбэх этээстээх дьиэлэри салайар хампаанньа бөх тоҕор сири ханан туруорары олохтоохтор баҕа санааларын учуоттаан быһаарар уонна Олохтоох дьаһалтаҕа этии киллэрэр. Олохтоох дьаһалта схеманы чинчийэн, Роспотребнадзор тэрилтэни кытта сөпсөһүннэрэн, үлэҕэ киллэрэр.

– Бөх быраҕар былаһааккалары ким бас билэрий? Ким хомуйуохтааҕый? Өрөмүөннээхтээҕий?

– Санитарнай туочукалары элбэх этээстээх дьиэлэргэ салайар хампаанньа дьаһайар. Чааһынай дьиэлэргэ Олохтоох дьаһалта көрөр, өрөмүөн үлэтин ыытар.
Үөһээ этиллибит тэрилтэлэр санитарнай былаһаакканы ыраастык тутуохтаахтар, көрүөхтээхтэр.

Санатар буоллахха, «Якутскэкосети» кулун тутар 1 -15 күнүгэр пенята суох төлөбүргэ аахсыйа биллэрдэ.

Ааспыт сылга «Экосети» ХЭУо саҥа хомунаалынай тиэхиньикэ кэлбитин, тэрилтэ үлэтин «Киин куорат» суруйан турар.