Кырдьаҕастары уонна инбэлииттэри көрүү иһин төлөбүрү оҥоруу бэрээдэгэ уларыйда

Кырдьаҕастары көрүү иһин төлөбүрү Саха Өрөспүүбүлүкэтигэр саҥа бэрээдэгинэн аныахтара, диэн тохсунньу 21 күнүгэр Социальнай пуонда Саха сиринээҕи салаатын салайааччыта Марина Герман брифиҥҥэ эттэ.
Ол курдук, 80 саастаах уонна онтон кырдьаҕастары уонна маҥнайгы группалаах инбэлииттэри көрөр үлэлээбэт гражданнарга оҥоһуллар төлөбүр кээмэйэ оройуон коэффициена суох 1,2 тыһ. солк. тэҥнэһэр этэ.
«Тохсунньу ыйтан бу төлөбүр ый аайы оҥоһуллубат. 80 уонна онтон аҕа саастаах кырдьаҕас уонна маҥнайгы группалаах инбэлиит биэнсийэтигэр ааҕыллар (I группалаах инбэлиит оҕолорто ураты). Ол эрээри Социальнай пуонда эрдэ анаммыт төлөбүрдэри олохтоммут болдьох бүтүөр диэри оҥоруоҕа. Төлөбүрдэри саҥаттан оҥорторор туһунан ханна да биллэрэр наадата суох. Олохтоммут болдьох бүттэҕинэ, пособие саҥа быраабыланан тиксэриллиэҕэ», – диэтэ кини.
Марина Герман санаппытынан, 80 уонна онтон аҕа саастаах кырдьаҕаһы уонна маҥнайгы группалаах инбэлиити көрөр кэм сайабылыанньаҕа олоҕуран страховой ыстааска киириэн сөп. Биир толору сылга 1,8 биэнсийэ тус коэффициена ааҕыллар, диэн кини эбэн этэ. Оттон сайабылыанньаны көрөр кырдьаҕас олорор сиринэн Социальнай пуондаҕа тиксэриэххэ сөп. Туспа олорор түгэҥҥэ, бу киһи атын киһи көрүүтүгэр наадыйарын бигэргэтэр туһунан сурук ирдэнэр. «Көрүүгэ наадыйар киһи өллөҕүнэ эбэтэр доруобуйатын туругунан итинник бигэргэтиини ылар кыах суох буоллаҕына, маны дьиэ кэргэн атын чилиэннэрэ бигэргэтэр кыахтаахтар», – диэтэ Марина Герман. Ол туһунан Ил Дархан уонна Бырабыыталыстыба пресс-сулууспата иһитиннэрэр.
Сонуннар
Ордук ааҕаллар


