Кырдьаҕастан — алгыһын, эдэртэн — эйэтин

Кылаастарга сүрүн ирдэбил: хамаанда сахалыы ааттаах, девизтээх, таҥастарыгар сахалыы анал бэлиэлээх буолуохтааҕа уонна киириигэ көҥүл ылар өс хоһоонун этии. Бу ирдэбили хамаандалар бары ымпыгар тиийэ толорбуттара, ох курдук оҥостон кэлбиттэрэ үөрдэр, толору бэлэмнээхтэрин көрдөрдө.

Тэрээһин арыллыытыгар «Ситим» эбэлэрэ алгыстаах алаадьынан көрүстүлэр. Хамаандалар өс хоһооннорун доргуччу этэн, «Иитии кыһата» мусуойга аастылар.

«Ситим-оонньуу» үөрүүлээх аһыллыытыгар салайааччы Надежда Павловна Жерготова Ситим күнүнэн эҕэрдэлээтэ, оонньуу сыалын-соругун билиһиннэрдэ, тэрийээччи эбэлэри, эһэлэри, хамаандалар ааттарын, девизтэрин билиһиннэрдэ.

Хамаандалар хапытааннара «Ситим-оонньууга» маршрутнай каарталарын туппуттарын кэннэ оонньуу барыта 5 түһүмэҕинэн ыытылынна:

1. Сатабыл;

2. Омурҕан;

3. Куйуур; 

4. Өбүгэ иһитэ-хомуоһа;

5. Өбүгэ оонньуута.

Бу түһүмэҕинэн сылдьан оҕолор өбүгэ үгэстэрин элбэҕи биллилэр-көрдүлэр, көхтөөхтүк кытыннылар. Ол курдук, бириэмэҕэ оҕуруону тистилэр, таабырын таайдылар, өс хоһооннорун ситэрэн биэрдилэр, саха төрүт бултуур тэриллэрин билистилэр, куйууру туттарга үөрэннилэр, өбүгэ иһитин-хомуоһун таайдылар, туохха туттулларын быһаардылар уонна түмүккэ өбүгэ «Баай тардыыта» оонньуутун бары дуоһуйа бириэмэҕэ оонньоотулар.

Оҕо хараҕар бары түһүмэхтэр сонун, сэргэх буолан, хамаандалар наһаа иллээхтик, бары биир киһи курдук үөрэ-көтө оонньоотулар. Тыҥааһыннаах оонньуу түмүгэ маннык буолла:

5-с кылаастарга

1 миэстэ — 5 «б» кыл. (сал. Иванова. С.С.)

2 миэстэ — 5 «а» кыл. (сал. Фёдорова М.И.)

3 миэстэ — 5 «в» кыл. (сал. Захаров С.С.)

6-с кылаастарга

1 миэстэ — 6 «в» кыл. (сал. Андреева Ю. Е., Амонова О. В.)

2-3 миэстэ — 6 «а» (сал. Васильева Н.П.)

2-3 миэстэ — 6 «б» (Потапова А. Е.)

Кыайыылаах кылаастар Анал хайҕал суругунан уонна мэтээлинэн бэлиэтэннилэр.

Бу күн оонньууга кыттыбыт 30 оҕоҕо барытыгар «Ситим-ооньуу» оҕолорго улахан суолтатын өйдөөн спонсордаабыт «Ситим» сүбэ эһээтигэр М.Е. Петровка улахан махталбытын тиэрдэбит.

Оттон оонньууну тэрийэн ыыттылар «Ситим» сүбэ көхтөөх эбэлэрэ, эһэлэрэ: Петрова М.М., Лазарева К.Г., Петрова Л.Н., Батюшкина Е.П., Саввинова Л.С., Жерготова Н.П., Иванов А.В., Петров М.Е., Жерготов Е.Е.

Оҕолор сүрдээҕин үөрбүттэрин, астыммыттарын, кылаас салайааччылара олус тэрээһиннээх, сонун, сэргэх, оҕолорго туһалаах оонньуу буолбутун бэлиэтээтилэр.

Суруйуубун «Ситим» сүбэ биир көхтөөх эбэтэ  Мария Михайловна Петрова: «Бүгүн 30 оҕону үөрэттэхпит, көстүбэт ситиминэн өбүгэлэрин кытта сибээстээтэхпит, үтүө үгэстэри умнубатыннар диэн өйдөттөхпүт», — диэн муударай этиитинэн түмүктүүбүн.

Биһиги бу квест оонньуутун олус күүскэ сөбүлээтибит, астынныбыт. Эбэлэрбитигэр, эһэлэрбитигэр маннык үчүгэй оонньууну оҥорбуттарыгар, билиибитин сайыннарбыттарыгар махтанабыт!