Кырдьаҕас куорат сылаас туалета балаҕан ыйын 1 күнүттэн үлэлиэҕэ

Нэһилиэнньэҕэ олус наадалаах эбийиэктэр баччааҥҥа диэри үлэҕэ киирэ илик төрүөттэрэ араас. Холобур, от ыйыгар Кырдьаҕас куоракка сылаас туалеты аҕалан туруорааттарын утаа Бүтүн Арассыыйатааҕы история уонна култуура пааматынньыктарын харыстыыр уопсастыба бэрэссэдээтэлэ Руслан Васильев уопсастыбаннай туалет биллиилээх судаарыстыбаннай уонна уопсастыбаннай диэйэтэл М.К. Аммосов олорбут дьиэтин таһыгар туруоруллубута федеральнай сокуону кэһэрин ыйан турар. Манан сибээстээн СӨ Былыргы тутуулары харыстыыр управлениетын салайааччыта Николай Макаров «Киин куоракка» эбийиэги «кыһыл сурааһынтан» таһааран биэрии боппуруоһу быһаарар диэн иһитиннэрбитэ. «Главстрой» гендириэктэрин солбуйааччы Афанасий Александров эмиэ туалет стационарнайа суох тутуу буоларын быһыытынан сакаасчыт ханна баҕар көһөрөн, сыҕарытан биэрэр кыахтааҕын быһаарбыта.

Инньэ гынан бүгүн, атырдьах ыйын 19 күнүгэр, эбийиэги биир-икки миэтэрэ сыҕарытан биэрэр буолбуттар. Балаҕан ыйын 1 күнүттэн туалеты үлэҕэ киллэрэр былааннанар.

Быйыл өссө үс саҥа туалет Кыайыы болуоссатыгар, Доҕордоһуу болуоссатын чугаһыгар, Култуура уонна сынньалаҥ пааркатыгар үлэҕэ киириэхтээхтэр. Инньэ гынан, сотору Дьокуускай үрдүнэн уопсайа алта сылаас уопсастыбаннай туалет баар буолуоҕа.

Оттон бүгүҥҥү күҥҥэ куорат баара эрэ икки сылаас уопсастыбаннай туалеттаах – Таалай күөл кытылыгар уонна Саха тыйаатырын кэннинэн. Туалеттар сарсыарда 09:00 чаастан киэһэ 21:00 чааска диэри үлэлииллэр, төлөбүрдэрэ – 50 солк.

Эбэн эттэххэ, Куорат пааркатыгар кыра оҕолоохторго аналлаах «Мамин дом» диэн дьиэҕэ эмиэ төлөбүрдээх (50 солк.) сылаас туалет үлэлээбитэ хаһыс да сыла.