Кырдьаҕас куоракка «Атыыһыттар кытыллара» саҥа аллея баар буолуоҕа

Бүгүн, балаҕан ыйын 12 күнүгэр, сарсыарда 11:00 чаастан эрэгийиэннэр икки ардыларынааҕы  мас скульптура  бэстибээлэ саҕаланар.

Манна Саха сирин, Сибиир уонна Уһук Илин идэтийбит скульптордара уонна үрдүк үөрэх кыһаларын устудьуоннара түмсүөхтэрэ. Кыттааччылар Дьокуускай сайдыытыгар сүдү кылааттарын киллэрбит меценат атыыһыттар уобарастарын айан таһаарыахтара.

Бэстибээл үлэлэрэ Кырдьаҕас куоракка экспозиция буолуохтара – «Атыыһыттар кытыллара» саҥа арт-аллеяны киэргэтиэхтэрэ.

Бэлиэтээн эттэххэ, бу бэстибээл Дьокуускай төрүттэммитэ 395 сылыгар бэлэмнэнии бастакы түһүмэҕэ буолуоҕа. Иккис түмүктүүр түһүмэх эһиил балаҕан ыйыгар ыытыллара былааннанар.

Тэрийээччилэр иһитиннэрэллэринэн, «Атыыһыттар кытыллара» меценат атыыһыттар ааттарын үйэтитиэҕэ, ону сэргэ Кырдьаҕас куоракка олохтоохтору уонна туристары угуйар култуура саҥа эбийиэгэ буолуоҕа.