Кыра дохуоттаах буоллахха...

Кыра дохуоттаах, тииһинэн олоруу алын кээмэйигэр хапсыбат (малоимущай) ыалларга судаарыстыба араас суол чэпчэтиини көрөр. Холобур, оскуолаҕа үөрэнэр кэмигэр оҕо сылаас аһылыгынан босхо хааччыллар, сылга биирдэ школьнай форманы ыларыгар көмө үп көрүллэр. Ону тэҥэ төрөппүт үлэтэ суох түгэнигэр бэйэ дьыалатын арынарыгар өйөбүл, төннөрүллүбэт үп ананыан сөп.

Тииһиммэт-түгэммэт олохтоох диэҥҥэ хапсары-хапсыбаты бастаан киһи бэйэтэ суоттуон сөп. Онуоха:

- Инники үс ыйга дьиэ кэргэн чилиэннэрэ киллэрбит дохуоттарын нолуоктана илик, ааҕыллыбыт кээмэйин олоччу эбэҕит.

- Тахсыбыт сууманы үскэ (ый ахсааныгар) түҥэтэҕит. Оччотугар ыйдааҕы орто дохуот кээмэйэ тахсыа.

- Ону дьиэ кэргэн киһитин ахсааныгар үллэрэҕит.

! Бу суокка, дохуоту ааҕыыга да кэргэнниилэр, оҕолор эрэ буолбакка, кыбартыыраҕа эбэтэр дьиэҕэ пропискалаах убай-эдьиий, ини-бии, эһэ-эбэ бары киирэллэр.

Суоттабыл түмүгэр тахсыбыт үп эрэгийиэннээҕи тииһинэн олоруу алын кээмэйиттэн кыра буолла да, тииһиммэт-түгэммэт олохтооххо киирсэҕит. Ол аата судаарыстыба көмөтүн туһанар бырааптанаҕыт.

Мантан салгыы сайабылыанньа суруйан туттарыахха наада буолар. Ону Судаарыстыбаннай өҥө порталын нөҥүө биитэр социальнай көмө миэстэтээҕи тэрилтэтигэр тиийэн эбэтэр МФЦ-га туттарыахха сөп. Онуоха хайаан да пааспардаах буолуохтааххыт. Сайабылыанньаҕа дьиэ кэргэн састаабын, аахсар дохуоккут уонна баайгыт-дуолгут туһунан киллэрэргит ирдэнэр.