«Кылаас салайааччыта-2025» күрэх үһүс төгүлүн ыытыллар

Кулун тутар 11-14 күннэригэр Саха сирин киин куората бастыҥ кылаас салайааччыларын түмэр сүрүн түһүлгэҕэ кубулуйуоҕа. Ол курдук, бу күннэргэ уһулуччулаах уһуйааччы, талааннаах педагог М.К. Петрова аатынан өрөспүүбүлүкэтээҕи «Кылаас салайааччыта-2025» күрэх үһүс төгүлүн ыытыллар. 

Кэтэхтэн түһүмэх – «Медиавизитка» диэн видеонан эссе күрэҕэ дьон-сэргэ киэҥ сэҥээриитин ылла. Куоластааһын Үөрэх управлениетын Вконтакте паблигар ыытылынна.

Кулун тутар 11 күнүгэр Марха 2-с №-дээх орто оскуолатыгар кыттааччылар аһаҕас уруоктары ыытан, маастарыстыбаларын көрдөрдүлэр. Маны таһынан, «Педагогическое интервью» диэн тургутууга дьүүллүүр сүбэни кытта социальнай суолталаах тыын боппуруостар тула аһаҕас дьүүллэһии түһүлгэтэ тэрилиннэ. Бастакы түһүмэх түмүгүнэн 15 лауреат аата билиннэ. 

Кулун тутар 12 күнүгэр Е.Ю. Келле-Пелле аатынан 26-с №-дээх оскуолаҕа уонна Дьокуускай куораттааҕы лиссиэйгэ «Маастар-кылаас» уонна «Брифинг» диэн бэрт сэргэх тургутуулар буоллулар.

Бүгүн, ол эбэтэр кулун тутар 13 күнүгэр, кыттааччыларга «Глобальнай үөрэхтээһин киинэ» гимназияҕа  «Блицтурнир» диэн бүтэһик быһаарыылаах түһүмэх ыытыллар.

Кулун тутар 14 күнүгэр Ф.И. Авдеева аатынан Оҕо айымньытын дыбарыаһыгар күрэх үөрүүлээх сабыллыытын сиэрэ-туома буолуоҕа.