Кылаабынай архитектор : боппуруос Ленин болуоссатын аатын уларытыы буолбакка, икки уопсастыбаннай туонаны тэрийии тула турар

> Бүгүн, тохсунньу 31 күнүгэр, киэһэ 18.00 чаастан Олохтоох дьаһалта дьиэтигэр (Ленин пр., 15) Ленин болуоссатын илин өттүгэр «Өрөспүүбүлүкэ болуоссата» диэн ааты иҥэрии тула уопсастыбаннай истиилэр буолаары тураллар.
Олохтоох дьаһалта саайта суруйарынан, бу боппуруос маҥнай Куораты тутууга уонна тырааныспар инфраструктуратыгар департамент начаалынньыга Иван Гуляев салайааччылаах биэдэмистибэлэр икки ардыларынааҕы хамыыһыйаҕа көрүллүбүт. Боппуруоһу дьүүллэһиигэ Олохтоох дьаһалта салайааччылара, архитектордар, историктар кыттыыны ылбыттар.
Куорат кылаабынай архитектора Семен Сергеев бэлиэтииринэн, боппуруос Ленин болуоссатын аатын уларытыы буолбакка, икки уопсастыбаннай туонаны тэрийии тула турар.
Архитектор этэринэн, уулусса Ленин пааматынньыктаах арҕаа өттө уруккутунан хаалар. Оттон быйыл саҥардыллан оҥоһуллубут өттүн арыйыы үөрүүлээх тэрээһинигэр Ил Дархан Айсен Николаев Өрөспүүбүлүкэ болуоссата диэн ааттыахха диэн этии киллэрбитин бары өйдүүбүт. Бу көҕүлээһини, куорат кылаабынай архитектора этэринэн, куорат түөрт тыһыынча кэриҥэ олохтооҕо илии баттааһыны хомуйан өйөөбүт. 
> Бэрээдэк быһыытынан, бу боппуруоһу маҥнай биэдэмистибэлэр икки ардыларынааҕы хамыыһыйа көрөн, уопсастыбаннай дьүүлгэ таһаарар, ол кэннэ Куорат дуумата нуорма-быраап аактатын ылынар. Биллэн турар, уопсастыбаннай истии түмүгэр олоҕуран.  
Семен Сергеев проспект саҥардыллыбыт болуоссатын аатын уларытары кэм ирдэбилинэн ааттыыр. 
«Маҥнай бу миэстэҕэ көстүүнэй (Гостиный двор) турбут. Ол көтүрүллүбүтүн кэннэ, 1957 сыллаахха, босхоломмут миэстэҕэ куорат маассабай тэрээһиннэрин ыытар сир оҥостоллор. Оччолорго уулусса Октябрьскай диэн ааты сүгэринэн, Октябрьскай уулусса болуоссата диэн ааттанар. Ол эрээри ити сыл куорат дьокутааттарын сэбиэтэ бу болуоссакка Владимир Ленин аатын биэрэр туһунан быһаарыы ылынар. Онон пааматынньык турар өттүн аатын оннунан хаалларарга диэн этиини сөптөөҕүнэн ааҕабын. Оттон саҥардыллыбыт өттө Өрөспүүбүлкэ болуоссата диэн буолара эмиэ сөптөөх. Онуоха аныгылыы архитектурата толору эппиэттиир... » – диэн санаатын үллэстэр Сергеев.
Санатар буоллахха, Ленин болуоссатын өрөмүөннэммит өттө ааспыт күһүн алтынньы 13 күнүгэр арыллан, Владимир Путин өйөбүлүн ылбыт куорат маастар-былаанын иитинэн олоххо киирбит бастакы уопсастыбаннай туона буолбута.