Кыбартыыра атыылыыбын диэн 29 мөлүйүөнтэн тахса солкуобайы уорбут

«Кини Арассыыйа ХК 159 ыст. 2, 3 уонна 4 чаастарынан 21 буруйу оҥорууга буруйданар (гражданнарга улахан хоромньуну аҕалыы, улахан эбэтэр ордук улахан кээмэйдээх албыннааһын)», — диэн биэдэмистибэ иһитиннэриитигэр этиллэр.

Силиэстийэ быһаарбытынан, бу иннинэ хаста да массыанньыктааһыҥҥа сууттаммыт дьахтар 2019 сыл ахсынньы ыйыттан 2025 сыл от ыйыгар диэри Дьокуускайга ырыынак сыанатыттан намыһах кыбартыыраны атыылаһарга көмөлөһүөхпүн сөп диэн дьону итэҕэтэн, харчыларын иҥэриммит.

Сокуоннай атыы-эргиэн көстүүтүн оҥорорго кини атыылаһыы усулуобуйатын, дьиэни туттарыы болдьоҕун уонна төлөбүр бэрээдэгин оҥорбут. Атыылаһааччылар киниэхэ итэҕэйэн эрдэттэн төлөбүр быһыытынан харчы биэрбиттэр. Уопсай хоромньу 29 мөлүйүөнтэн тахса солкуобайга тэҥнэспит.

Холуобунай дьыала суукка ыытылынна.

Маны таһынан силиэдэбэтэллэр 2 мөлүйүөн кэриҥэ суумаҕа көмүс оҥоһуктары уорбаланааччы ломбардка туттара охсубутун былдьаабыттар.