Кыайыы Знамята Хатас нэһилиэгин устун айанныыр

Улуу Кыайыы солбуллубат бэлиэтэ буолбут Кыайыы Знамятын үтүгүллүүтэ (куоппуйата – Аапт.) нэһилиэкпит тэрилтэлэрин устун айана баһылык Е.П.  Пермяков салайааччылаах олохтоох дьаһалта уонна В.А. Чепалов дириэктэрдээх Хатастааҕы «Тускул» КК көҕүлээһиннэринэн ыытыллар.

Улуу Кыайыы 70 сылыгар Знамяны төлөннөөх хомсомуол сааһыттан дойду туһа диэн үлэлээбит-хамсаабыт Василий Васильевич Гоголев Хатас олохтоох дьаһалтатыгар, «Тускул» КК  бэлэхтииригэр, ыччаты, эдэр көлүөнэни иитиигэ оруолун толору туһаныаххыт диэн эрэлин эппитэ.

Быйылгы, Улуу Кыайыы 80 сылыгар аналлаах аахсыйа олунньу 20 күнүттэн нэһилиэкпит биир саамай көхтөөх, бүтүн өрөспүүбүлүкэҕэ биллэр-көстөр үлэлээх-хамнастаах СӨ үөрэҕириитин туйгуна, РФ үөрэҕириитин бочуоттаах үлэһитэ Галина Семеновна Николаева сэбиэдиссэйдээх 70 №-дээх «Кэрэчээнэ» уһуйаантан саҕаламмыта. Аахсыйа ирдэбилин быһыытынан Кыайыы Знамята турар кэмигэр тэрилтэ ыытар араас тэрээһиннэриттэн биирэ нэһилиэнньэҕэ туһуламмыт буолуохтаах. Онон «кэрэчээнэлэр» сүрдээх дириҥ ис хоһоонноох кэнсиэри бэлэмнээбиттэрэ. Манна даҕатан эттэххэ, быйылгы дойду үрдүнэн киэҥник бэлиэтэнэр үбүлүөйдээх сылга биһиги Хатаспыт төрүттэммитэ 380, Учуутал Самсоновтар ааттарынан орто оскуолабыт 110, «Кэрэчээнэ» уһуйаан 60 сыллара уонна Аҕа дойду Улуу сэриитин кыттыылааҕа, ССРС култууратын туйгуна, РСФСР уонна САССР култууратын үтүөлээх үлэһитэ, Хатастааҕы бибилэтиэкэни өр сылларга салайбыт И.Д. Панаев төрөөбүтэ 100 сыла курдук өйгө-санааҕа хаалар үтүөкэн күннэрдээхпит, бэлиэ түгэннэрдээхпит.

«Кэрэчээнэлэр» үгэс курдук бу тэрээһиҥҥэ дириҥ хорутуулаахтык, эппиэтинэстээхтик сыһыаннастылар. Кыайыы Знамята турар сирин оҥоһуутуттан, киэргэтииттэн саҕалаан, барыта орун оннугар, дьоһун. Оҕо дьоммут өйдөрүгэр-санааларыгар хатыырга туһуламмыт аралдьытар дьарыктар, күрэстэр, көрүүлэр буоллулар, төрөппүттэргэ, оҕолорго, үлэһиттэргэ анаан оҕо саадын, нэһилиэк устуоруйатын сэһэргиир анал муннук тэрилиннэ. Уһуллубут киинэлэр, докумуоннар түмүлүннүлэр, үйэтитии үлэтин эйгэтин кэҥэттилэр.

Аахсыйабыт өссө биир уталытыллыбакка туолуохтаах ирдэбилэ – «Тускул» КК иһинэн «Үйэ» аудиовизуальнай устуудьуйа тустаах тэрилтэ туһунан биэриини устуута. Онон бу үлэ кэлэр көлүөнэ ыччакка Хатаспыт сайдар-үүнэр олугун кимнээх туппуттарын-айбыттарын биллэриэ, кэпсиэ турдаҕа.

Инньэ гынан 2025 сылга СӨ култууратын министиэристибэтинэн биллэриллибит «Год исторической памяти» диэн хайысхаҕа нэһилиэкпит кэпсиирдээх-көрдөрөрдөөх буолар. Дьэ ити курдук бу аахсыйа түмүктэниитигэр олохтоох түмэлгэ Хатас нэһилиэгэ билиҥҥи киэбин, тугунан тыынан олорорун, урукку өттүгэр хайдах дьаһанан кэлбитин кэпсиир баай ис хоһоонноох видеоматырыйаал хомуллуохтаах.

Бүгүҥҥү күҥҥэ Кыайыы Знамята Аҕа дойду сэриитин кыттыылааҕа И.Д. Панаев аатынан библиотекаҕа, 7 №-дээх спорт оскуолатыгар, «Прогресс» тутуу тэрилтэтигэр, Оҕо ускуустубатын оскуолатыгар сырытта.