«Кыайыы волонтердара» хамсааһыҥҥа 4 тыһ. тахса киһи кыттыа

Муус устар 14 күнүгэр СӨ Ыччат дьыалатыгар уонна социальнай коммуникацияларга миниистирин бастакы солбуйааччыта Надежда Мохначевская социальнай ситиминэн быһа эпииргэ тахсан, «Кыайыы волонтердара» хамсааһын туһунан сиһилии кэпсээтэ, ыйытыыларга хоруйдаата.

2025 с. устата Кыайыы 80 сылын куорпуһа өрөспүүбүлүкэ үрдүнэн 4 тыһ. киһини хабар былааннааҕын иһитиннэрдэ.

«Кыайыы волонтердарын сүрүн үлэтэ –­ бэтэрээннэргэ кыһамньылаах сыһыан, өйдөбүнньүк миэстэлэри тупсаҕай оҥоруу, киэҥ хабааннаах аахсыйалары уонна «Георгиевскай лиэнтэ», «Тиэргэнинэн ыллыыбыт», «Өйдөбүнньүк чүмэчи», «Кыайыы диктана», «Өлбөт үйэлээх полк» уо.д.а. дьоһун суолталаах тэрээһиннэри ыытыыга көмөлөһүү. Ону сэргэ үлэ биир сүрүн хайысхатынан Аҕа дойду Улуу сэриитин кырдьыктаах историятын харыстааһын уонна историяны үөрэтиини көҕүлээһин буолар», – диэтэ Надежда Мохначевская.

Кыайыы волонтерунан 14-тэн үөһээ саастаах ким баҕалаах буолуон сөп. Сыл устата волонтердары үөрэтии ыытыллан кэллэ. Олунньу, кулун тутар ыйдарга волонтердары үөрэтии 1-кы уонна 2-с блоктара буолан ааспыт. Манна өрөспүүбүлүкэ бары муннугуттан ким сирэй, ким тэйиччиттэн олорон үөрэммиттэр. Оттон муус устарга 3-с блок сирэй үөрэх көрүҥүнэн Дьокуускайга ыытыллыа, манна 250 киһи кыттыа (муус устар 15-16 күннэригэр Орджоникидзе, 10 дь. ыытылынна. - Аапт.)

Маны таһынан быһа эпиир кэмигэр Надежда Мохначевская «Послы Победы. Москва» бырайыак туһунан кэпсээтэ. Куонкурус кыайыылаахтара Москваҕа Кыһыл болуоссакка ыытыллар сүрүн Кыайыы парадын арыаллыыр волонтердар куорпустарын тэрийиэхтэрэ. Ыам ыйын 5-10 күннэригэр Бүтүн Арассыыйатааҕы «После Победы. Москва» куонкурус кыайыылаахтарын слетугар Саха сириттэн  М.К. Аммосов аатынан ХИФУ Хотугулуу-Илиҥҥи норуоттар тылларын уонна култуураларын институтун устудьуона Сайаана Аммосова уонна Ленскэй оройуонуттан Витим бөһүөлэгин орто оскуолатын историяҕа уонна обществознаниеҕа учуутала Ольга Бутакова кыттыахтара.

Кыайыы волонтердара үлэлэрин алта хайысханан ыыталлар: «Улуу Кыайыы» – параадтары, аахсыйалары тэрийии, өйдөбүнньүк миэстэлэри, буойуннар көмүүлэрин харайыы, Арассыыйа аахсыйаларыгар кыттыы; «Көлүөнэлэр ситимнэрэ» – бэтэрээннэргэ араас өрүттээх көмө: кинилэрдиин ыкса алтыһыы, бэлиэ күннэринэн эҕэрдэлээһин, ахтыылары хомуйуу, дьиэ ис-тас үлэтигэр көмөлөһүү; «Медиакыайыы» – санаа көтөҕүүлээх, интерактивнай контени интэриниэт ситимигэр оҥоруу, ыстатыйалары суруйуу, хаартыскаҕа түһэрии, видеоҕа устуу, социальнай ситимнэргэ аккауннары салайан ыытыы; «Биһиги Кыайыыларбыт» – Арассыыйа историятын, араас эйгэҕэ дойду ситиһиитин сырдатыы, квестэри, викториналары о.д.а. тэрийии; «Мин историям» – дьон Аҕа дойду Улуу сэриитигэр кыттыбыт өбүгэлэрин, эһэлэрин, эбэлэрин туһунан информацияны көрдүүллэригэр көмөлөһүү; «Мин кыайыым» – волонтер алтыһыы, лидер, хамаандаҕа үлэлиир көх, социальнай суолталаах бырайыактарга үлэлээһин курдук хаачыстыбаларын сайыннарыы.

Хаартыска: Быһа эпиир түгэниттэн