Кыайыы салюта ньиргийиэ

Аҕа дойду Улуу сэриитигэр Кыайыы 80 сылын бэлиэтээһини бэлэмниир тэрийэр кэмитиэт уочараттаах сүбэ мунньаҕа буолла. Дьокуускай куорат баһылыгын солбуйааччы, уокуруктааҕы дьаһалта аппараатын салайааччыта Руслан Тимофеев уонна Дьокуускай куорат Дууматын бэрэсэдээтэлин солбуйааччы Евдокия Евсикова үлэлиир бөлөхтөр дакылааттарын иһиттилэр. 
Мунньахха Кыайыы пааркатыгар ыытыллыахтаах тэрээһиннэргэ бэлэмнэниини ырыттылар.Туох баар бэлэмнэнии үлэтэ ыам ыйын 5 күнүгэр бүтүөхтээх. Маны сэргэ ССРС Дьоруойдарын аатын сүгэр уулуссаларга өрөмүөн, грейдердээһин, Аҕа дойду сэриитин кыттыылаахтарыгар анаммыт памятниктары, өйдөбүнньүк дуоскалары, табличкалары чөллөрүгэр түһэрии үлэтэ ыытыллыа. 
Туох баар тэрилтэлэр, үөрэх, медицина тэрилтэлэрин дьиэлэрэ Кыайыы бырааһынньыктааҕы үбүлүөйдээх бэлиэтинэн тастарын киэргэтиэхтэрэ. Сүбэ мунньах хаамыытыгар куорат таһынааҕы бөһүөлэктэргэ бырааһынньыктааҕы билбордары туруорар туһунан этии киирдэ.
Кыайыы күнүн бэлиэтээһин сүрүн тэрээһиннэрэ ыам ыйын 8 уонна 9 күннэригэр ыытыллыахтара. Үгэскэ кубулуйбут "Өйдөбүнньүк чүмэчитэ", мемориалларга сибэкки ууруу курдук тэрээһиннэри таһынан, ыам ыйын 8 күнүгэр "Кыайыы проспега" диэн улахан бырагыраама бастакытын ыытыллыа. Орджоникидзе болуоссатыттан Доҕордоһуу болуоссатыгар диэри сүрүн уулусса былаһын тухары араас сирдэринэн куорат олохтоохторо уонна ыалдьыттара кытталларыгар анаан култуурунай-маассабай, байыаннай-историческай, патриоттуу аахсыйалар буолуохтара. Итинэн сиэттэрэн тырааныспар уонна суол инфраструктуратын управлениетыгар тырааныспар сырыытын бүөлүүр, оптуобустар тумнан барар суолларын схематын оҥороллоругар, ол туһунан нэһилиэнньэни эрдэттэн сэрэтэллэригэр  сорудах бэрилиннэ.
Кыайыы күнүн тэрээһиннэрин кэмигэр куттал суох буолуутугар, бэрээдэги араҥаччылааһыҥҥа миэрэлэр күүһүрдүллүөхтэрэ.
Кыайыы күнүн муҥутуур чыпчаалынан Кыайыы болуоссатыгар 22:00 ч. салют ньиргийиэ.
Дьокуускай куорат баһылыгын солбуйааччы Руслан Тимофеев үлэлиир бөлөхтөргө бэлэмнэнии тэрээһиннэри кэмигэр түмүктүүллэригэр соруйда.

 Дьокуускай куорат уокуруктааҕы дьаһалтатын пресс-сулууспатын иһитиннэриитинэн.