Кыайыы эстафетата – история уонна үгэс

Доҕордоһуу болуоссатыгар турар Суорун Омоллоон аатынан Опера уонна балет тыйаатырын иннигэр эстафета үөрүүлээхтик аһылынна.

Саха Өрөспүүбүлүкэтин физическэй култуураҕа уонна спорка миниистирин э.т. Гаврил Мохначевскай, Дьокуускай куорат физическэй култуураҕа уонна спорка управлениетын начаалынньыга Эдуард Ефимов, «Саха Бэчээт» гендириэктэрэ Ньургуйаана Стручкова, «Якутия» хаһыат сүрүн эрэдээктэрэ Матрена Кондратьева, боксаҕа аан дойду үрүҥ көмүс призера, Арассыыйа биэс төгүллээх чөмпүйүөнэ, Арассыыйа спордун үтүөлээх маастара, Кыайыы эстафетатын амбассадора Василий Егоров күрэхтэһии кыттыылаахтарын эҕэрдэлээтилэр.

Эстафета үгүс көлүөнэ быһыйдар хамаандаларын туһугар кыайыыга дьулуһар, үрдүк көрдөрүүлэри ситиһэр, кыайыылаахтары чиэстиир, улахан күрэхтэһиилэргэ кынаттыыр, саҥа ааттары таһаарар. Улуу Кыайыыны уһансыбыт сэрии бэтэрээннэрин, быыра быһыйдарбыт тустарынан үтүө өйдөбүнньүк быһыытынан билиниллэр, тапталлаах Сахабыт сирин сураҕырдар уҕараабат суолталаах. Номоххо киирбит «эстафета палочкатын» аныгы көлүөнэҕэ тиэрдэн, салҕаан иһэр историяҕа тиһэр үрдүк аналлаах.

Кыайыы эстафетатын сүрүн судьуйатынан бэйэтин кэмин күүстээх сүүрүгэ-быһыйа, оҕолорго уонна устудьуоннарга Арассыыйа, Уһук Илин уонна Саха Өрөспүүбүлүкэтин чөмпүйүөнэ, кыайыылааҕа, билигин 1 №-дээх оҕо спортоскуолатыгар тренердиир, чэпчэки атлетикаҕа өрөспүүбүлүкэ оҕолорун сүрүн тренерэ Сергей Гуляев үлэлээтэ. Эрчимнээх куолаһынан хамаандалаан, эстафетаны саҕалаабытынан барда. Өрүскэ уу кэлэн иһэр сибикитэ биллэр буолан, тыаллаах, тымныы салгыннаах.

Эстафета сүүрэр суола биир барыы. Доҕордоһуу болуоссатыттан «стартаан» Ленин проспегын устун элээрэ тураллар уонна Ленин проспегын 1№-гэр турар «Алмазэргиэн баантан» төттөрү кэлэн «фиништииллэр».

Бастаан оскуола оҕолорун 25 хамаандата саҕалаатылар. Айсен Григорьев (850 м), София Васильева (350 м), Алексей Татаринов (500 м), Виолетта Ионова (390 м), Сулустаан Шишигин (390 м), Эркин Эркинов (300 м), Милена Самсонова (200 м), Арчын Саввин (350 м), Илиана Куприянова (650 м), Илья Билюкин (200 м) састааптаах А.Г. Чиряев аатынан Дьокуускай куорат национальнай гимназиятын хамаандата 11 мүн. 21 сөк. көрдөрүүлээх биэтэккэ бастакынан кэллэ, 31-с оскуола – иккис (11 мүн. 37 сөк.), 23-с оскуола – үһүс (11 мүн. 41 сөк.).

Бириистээх 1-кы түһүмэҕи оҕолорго Арассыыйа быйылгы чөмпүйүөнэ, чэпчэки атлетикаҕа өрөспүүбүлүкэ кыһыҥҥы чемпионатыгар улахан дьону кыайбыт, 1 №-дээх оҕо спортоскуолатыгар тренер Наталья Сотниковаҕа эрчиллэр, бу эстафетаҕа сэттис миэстэлэммит Дьокуускай куорат лицейин 8 кылааһыгар үөрэнэр Богдан Куценко бастакынан түмүктээтэ.

Богдан Куценко:

– В принципе, бежал хорошо, но ветер и погода помешали, прохладно, но ничего, в любую погоду бегаем. О дистанции не думал, просто бежал и бежал. Короткий отрезок, 850 метров всего. После победы в январе на чемпионате республики мы готовились к Первенству России среди юношей до 16 лет, и там успешно выступил и стал двухкратным чемпионом на дистанциях 1500 м и 3000 м. Тренируюсь в ДЮСШ-5 у тренера Сотниковой Натальи Дмитриевны.  Сейчас готовимся к Первенству России “Ю-18”, который пройдет в г. Челябинск. Готовимся очень активно на хороший результат. Бег для меня это то, что движет меня в жизни. Не представляю себя без бега.

Үрдүк уонна орто анал үөрэх кыһаларыгар М.К. Аммосов аатынан ХИФУ Станислав Саввинов (850 м), Анна Николаева (350 м), Иван Саввинов (500 м), Яна Бережецкая (390 м), Эрсан Бурцев (390 м), Аркадий Тимофеев (300 м), Валерия Олесова (200 м), Данил Федоров (350 м), София Ефимова (650 м), Владислав Яколвев (200 м) быһыйдардаах хамаанда бастаата. С.Ф. Гоголев аатынан Дьокуускайдааҕы педколледж – иккис, Арктикатааҕы судаарыстыбаннай агротехнологическай университет үһүс миэстэлэннилэр.

Үлэ кэлэктииптэригэр үөрэх профсойууһун үлэһиттэрин Петр Сячиков (850 м), Диана Адасько (350 м), Александр Нечаев (500 м), Сардаана Калитина (390 м), Александр Ушницкай (390 м), Виктор Попов (300 м), Валентина Иванова (200 м), Леонид Филиппов (350 м), Анастасия Охотина (650 м), Сергей Чунарев (200 м) быһыйдардаах хамаандата 11 мүн. 37 сөк. көрдөрүүлээх бастаата, ЫБММ Саха сиринээҕи управлениетын быһыйдара –иккис, спорт министиэристибэтэ үһүс бириистээх миэстэлэргэ тигистилэр.

Бириистээх 1-кы түһүмэххэ ЫБММ байыаһа, өрөспүүбүлүкэ чөмпүйүөнэ, марафоҥҥа спорт маастара Роман Алексеев кыайыыны ситистэ.

Роман Алексеев:

– Күрэхтэһии үчүгэйдик ааста. Арыый тыаллаах, ол да буоллар, кыттааччылар син бааллар. Урут бастакы этапка 1100 м сүүрэр эрдэхпитинэ ордук этэ. 850 м арыый кылгас дии саныыбын. 800, 1500, 3000 м дьарыктанар эдэр уолаттар бааллар. Мин сүүрэр дистанциям уһун. Кыайыыбыттан үөрдүм. Бэйэм тактикабын тутустум. Дистанция аҥаарыттан үлэлээн киирэн барбыппар уолаттар хаалбыттара. Ыам ыйын 3 күнүгэр Казаньҥа Арассыыйа чемпионатыгар кыттан кэллим. Хомойуох иһин, тумуулаан хаалан туораабытым. Тоҕо диэтэххэ от ыйын 4 күнүгэр Санкт-Петрбурга “Белые ночи” сүүрэбин  уонна сүрүн соругум – бу кэлэр күһүн Арассыыйа чемпионатыгар 100 км кыттаммын, норуоттар икки ардыларынааҕы кылаастаах маастар нуорматын бигэргэтиэхтээхпин. Онно бэлэмнэнэ сылдьабын.

Күүстээх, үчүгэй дьарыктаахтар кыайыы көтөллөннүлэр. Өйдөбүнньүк мэтээллэринэн, грамоталарынан, ону таһынан 850 м уһуннаах 1-кы этап кыайыылаахтара 5000 солкуобыйынан, бастаабыт хамаандалар Кубоктарынан наҕараадаланнылар. Сэрии сылларыгар саҕаламмыт, «Социалистическая Якутия», кэлин, «Якутия» хаһыат бирииһигэр сыллата ыытыллар, күн бүгүнүгэр диэри бара турар «Кыайыы эстафетата» үйэлэргэ салҕанар аналлаах.