Кыайыы болуоссатыгар курдук газону аны Ийэ скверигэр ыһыахтара

Исписэлиистэр ааттыылларынан маннык портьернай классическай газону хантан атыыласпыттарын уонна өссө салгыы ханна ыһар былаан баарын туһунан бүгүн «Россия 24» ханаал «Куораты кытта быһа эпиир» биэриитигэр Дьокуускай куорат баһылыгын сүбэһитэ дендролог Екатерина Павлова кэпсээтэ.

Санатар буоллахха, Кыайыы болуоссатыгар көҕөрдүү үлэтэ бүтэһигин 2011 сыллаахха ыытыллыбыта. Ол кэннэ былырыын манна 6 тыһ. кв/миэтэрэ иэннээх сиргэ газон ыһыллыбыта. Олордуу ылсарын туһугар бэдэрээтчит буору барытын саҥардыбыта, уоҕурдубута, автоматическай уу кутар ситими тардыбыта, Саха сирин тыйыс тымныытын тулуйар усулуобуйатын тэрийбитэ.

Екатерина Олеговна иһитиннэрбитинэн, газон сиэмэтэ анаан-минээн Иркутскайтан атыылаһыллыбыт. Бырайыак быйыл бэрэбиэркэни ааһан, сөптөөх усулуобуйаны тэрийдэххэ, көрүүнү-истиини хааччыйдахха, үүнэрэ быһаарыллан, быйыл маннык газону Ийэ скверигэр ыһар былаан баар. Онуоха анаан 2 тыһ. кв/миэтэрэ иэннээх сири бэлэмнииллэр. Бу курдук сыллата куоракка чээлэй күөх газоннаах сири элбэтэн иһиэхтэрэ.