Кыайыы 80 сылын сыыппаралара
Саха сиригэр 13 958 сэрии бэтэрээнэ олорор. Кыайыы 80 сылынан кинилэргэ уопсайа 172,6 мөл. солк. суумалаах биир кэмнээх төлөбүр оҥоһуллубут: 9 – уоттаах сэрии кыттыылааҕа, 11 – Ленинград блокадатын сиэртибэтэ, 222 – сэрии бэтэрээнин огдообото, 5 – сокуоннай сааһын ситэ илик кэмигэр концлааҕыр сиэртибэтэ, 1 495 – тыыл бэтэрээнэ, 12 216 – сэрии сылларын оҕото.
1 688 бэтэрээҥҥэ «80 лет Победы в Великой Отечественной войне 1941-1945 гг.» Арассыыйа таһымнаах мэтээл туттарыллыбыт. Саха сирэ эмиэ маннык хабааннаах мэтээли туттарыаҕа.
Сахаттан бастакы Сэбиэскэй Сойуус Дьоруойа Федор Кузьмич Попов төрөөбүт дойдутугар Мэҥэ Хаҥалас Бэдьимэ нэһилиэгэр гааһы киллэриигэ 2025 сылга өрөспүүбүлүкэ бүддьүөтүттэн 186 мөл. солк. тыырыллыбыт.
«Память» кинигэ 10 тома сыыппараҕа көспүт. Кинигэни https://new.nlrs.ru/collections/274. сигэнэн көрүөххэ сөп.
«Кыайыы былааҕа» эстафета бүгүҥҥү күҥҥэ өрөспүүбүлүкэ 31 оройуонун ааста. Ыам ыйын 8 күнүгэр Дьокуускайга түмүктэниэҕэ.
Дьокуускай куоракка Кыайыы 80 сылын бэлиэтиир 46 араас хабааннаах тэрээһин былааннанар. Тэрээһиннэр ыам ыйын 2 күнүттэн «Помним! Гордимся! Благодарим!» эстафетаттан саҕаланыахтара.
Бу туһунан Ил Дархан Айсен Николаев баһылыктаах Улуу Кыайыы 80 сылын тэрийэр кэмитиэт мунньаҕар иһитиннэрдилэр, диэн Ил Дархан уонна Бырабыыталыстыба пресс-сулууспата суруйар.
Хаартыска: Андрей Сорокин, СИА
Сонуннар
Ордук ааҕаллар
