Кыайыы 80 сылын көрсөргө бэлэмнэнии үлэтэ барар

Бэҕэһээ Аҕа дойду Улуу сэриитигэр Кыайыы 80 сылын бэлиэтиир тэрээһин Дьокуускайдааҕы тэрийэр кэмитиэтин мунньаҕа буолла. Бу улахан бэлиэ тэрээһини көрсө ыытыллыахтаах куораты  киэргэтииттэн, көҕөрдүүттэн саҕалаан култуурунай бырагыраамаҕа тиийэ боппуруостары дьүүллэстилэр.
"Бэтэрээннэрбитин, куорат олохтоохторун уонна ыалдьыттарын үөрдэр саҥаны киллэриилэр баар буолуохтара. Чуолаан эттэххэ, бу сылга, быһа холоон ыам ыйын бүтүүтүттэн, Кыайыы болуоссатыгар хаачыстыбалаах көҕөрдүү үлэтин ыытары былаанныыбыт: таммаҕынан нүөлсүтүллэр газону оҥоруу, харыйалары олордуу", – диэтэ куорат баһылыга Евгений Григорьев.
Маны таһынан 202-с түөлбэҕэ баар "бэтэрээннэр дьиэлэрин" эркинин бырааһынньыктааҕы муралынан (монументальнай живопиһынан) киэргэтэри, медколледж муралын реставрациялыыры былаанныыллар.
Кыайыы күнүн көрсүү биир бэлиэ тэрээһининэн Сэбиэскэй Сойуус Дьоруойа Федор Кузьмич Попов искибиэригэр Дьоруой пааматынньыгын үөрүүлээхтик арыйыы буолуо. Пааматынньык постамена бэлэм буолан номнуо Дьокуускайга аҕалыллыбыт, оттон пааматынньыга айаннаан иһэр диэн иһитиннэрдилэр. Маны таһынан Кыайыы үбүлүөйдээх сылыгар номоххо киирбит артиллерист Гавриил Протодьяконовка пааматынньык туруоруллара былааннанарын эттэ.