Кыайыы 80 сылыгар бэлэмнэнии хаамыыта хайдаҕый?

Ил Дархан Айсен Николаев уонна өрөспүүбүлүкэ киин куоратын баһылыга Евгений Григорьев бэҕэһээ Улуу Кыайыы 80 сылын бэлиэтиир тэрээһиннэр сүрүн былаһааккаларын бэрэбиэркэлээтилэр.
Салалта ол курдук Кыайыы болуоссатыгар, Федор Попов аатынан сквергэ, Бары сибэтиэйдэр храмнарыгар, Кыайыы пааркатыгар, Хомсомуол болуоссатыгар уонна Култуура уонна сынньалаҥ пааркатыгар сырытта.

Куорат салайааччыта Евгений Григорьев Ил Дархаҥҥа иһитиннэрбитинэн, ыам ыйын 4 күнүнэн бары былаһааккалар бэлэм буолуохтара. «Официальнай тэрээһиннэр ыам ыйын 6 күнүттэн саҕаланыахтара. Бырагыраама быһыытынан бу күн Кириэстээх хаамыы былааннанар», – диэтэ кини.

Евгений Григорьев ордук тоһоҕолоон Сэбиэскэй Сойуус Дьоруойа Федор Поповка уонна артиллерист Гавриил Протодьяконовка арыллыахтаах пааматынньыктар, «Дьокуускай - килбиэннээх үлэ куората» үрдүк ааты бэлиэтиир ааркаҕа тохтоото.
Баһылык Кыайыы үбүлүөйдээх 80 сылын көрсө тупсарыы, ыраастаныы үлэтэ тэтимнээхтик барар, диэн Олохтоох дьаһалта пресс-сулууспата иһитиннэрэр.