Кыайыы 80 сылыгар аналлаах тэрээһиннэр түмүктэрин таһаардылар

1941-45 сыллардааҕы Аҕа дойду Улуу сэриитигэр Кыайыы 80 сылыгар аналлаах тэрээһиннэри түмүктүүр мунньах Олохтоох дьаһалтаҕа куорат баһылыга Евгений Григорьев, Куорат дууматын бэрэссэдээтэлэ Альберт Семенов уонна куорат баһылыгын солбуйааччы – дьаһалта аппараатын салайааччыта Юрий Петров кыттыылаах буолан ааста.

Баһылык Евгений Григорьев эһэлэрбит, аҕаларбыт Аҕа дойду көмүскэлигэр биир киһи курдук туруммуттарын, үгүстэр чугас аймахтара фроҥҥа тыылга үлэнэн көмөлөспүттэрин, кыргыһыы хонуутугар охтубут саллааттары тэҥинэн тыыл аас-туор олоҕо үйэлэргэ оһоруллубат сүтүгү сүктэрбитин бэлиэтээтэ.

Ити тылларынан Евгений Григорьев историяны билэр, үөрэтэр булгуччулааҕын санатта.

Быйылгы үбүлүөйдээх сылларынан ыытыллыбыт тэрээһиннэр туһунан иһитиннэриини баһылыгы солбуйааччы Юрий Петров оҥордо. Ол курдук, Дьокуускай куорат территориятиыгар сыл устата тутуу, тупсарыы хабааннаах 115 тэрээһин ыытыллыбыт. Сүрүн болҕомто манна куораты тупсарыыга ууруллубут – Аҕа дойду сэриитин кыттыылаахтарыгар аналлаах пааматынньыктары, уулуссалары, мемориаллары тупсарыы, саҥардыы, о.д.а. Кыайыы пааркатыгар саҥа сцена тутуллубут. Былааннаммыт үлэ барыта болдьоҕор түмүктэммит.

Манны таһынан 250 култуурунай-маассабай тэрээһин ыытыллыбыт. Нэһилиэнньэ ордук Ильмень күөл кыргыһыытын театрализованнай дьүһүйүүнү, Кыайыы былааҕын туттарыыны, Кыайыы нэһилиэнньиктэрин сүүрүүтүн, Кыайыы вальсын өр сылларга өйдөөн хаалыаҕа бэлиэтэннэ. Биллэн турар, ааһан эрэ сыл Туймаада ыһыаҕа эмиэ Улуу Кыайыы 80 сылыгар анаммыта. Ыытыллыбыт тэрээһиннэр бары дьоруойдар ааттарын ытыктыырга, дойдумсах буолууну күүһүрдэргэ, норуоту сомоҕолуурга туһуламмыттара, диэн Олохтоох дьаһалта пресс-сулууспата иһитиннэрэр.