Кыһыл Сыырга «СырФест-2026» буолан ааста

Бүлүү өрүс кытылыгар тыһыынчанан киһи, ас-үөл мааныта, атыы-эргиэн, араас күрэхтэһиилэр уонна уоттаах-күөстээх кэнсиэр — бу барыта «СырФест-2026». Бэстибээли Гаас промышленноһын үлэһитин күнүгэр ЯТЭК өйөбүлүнэн «КЫН» Кыһыл Сыыр сайдыытын пуондата үһүс төгүлүн тэрийэр.

Бүлүү куораттан манна биир чаас курдук айаннаан тиийэҕин. 1961 сыллаахха тутуллубут бөһүөлэккэ билигин үс тыһыынча кэриҥэ киһи олорор. Үгүс олохтоох дьон гаас промышленноһыгар үлэлиир — ЯТЭК уонна «Сахатранснефтегаз» тэрилтэлэригэр. 

Кэнникки сылларга кыракый дэриэбинэҕэ араас тутуу элбээтэ: стадион, спортзал, скейт-парк, аллея, о.д.а. Сотору кэминэн МФЦ үлэҕэ киириэхтээх, ону таһынан өрүс кытылыгар тупсарыы үлэтэ барыахтаах. 

Бу 5-6 сиринэн кэлбит ыалдьыттарга араас босхо тэрээһиннэр буоллулар: эти-хааны чэбдигирдэр сэрээккэ, сүүрүү; ис туругу тургутуу; маастар кылаастар; салгыҥҥа көтөр саарга, квадроциклга хатааһылааһын, о.д.а. (Толору бырагырааманы сиһилии бу манна көрүөххүтүн сөп).

Сүрүн ыҥырыылаах ыалдьытынан маҥнайгы «Фабрика звезд» бырайыак кыайыылааҕа «Корни» бөлөх буолла. Киэһэ өрүс кытылыгар босхо кэнсиэргэ биллибит ыарыаларын («Ты узнаешь ее», «Я теряю корни», «Плакала береза», «На 25 этаже», о.д.а.) толорон бу бырааһынньыгы киэргэттилэр. 
Онтон бу барыта хайдах аастай диир буоллахха, «Эхо столицы» устубут видеотын көрөргө ыҥырабыт.

Дьон-сэргэ дуоһуйа сынньанан, астынан, тэрээһин үрдүк таһымнаахтык ааста дии саныыбыт. Бэлиэтээн этэххэ, бэстибээлгэ киирбит үп-харчы бөһүөлэк сайдыытыгар барар.