Куйааска тэйиччиттэн үлэҕэ көһүөххэ сөп дуо?

«Үлэһит бу көрдөһүүтүнэн үлэ биэрээччигэ сайабылыанньа суруйар бырааптаах. Салгыы салайааччы тэйиччиттэн үлэҕэ көһүү туһунан бирикээс таһаарар, оттон үлэһитин кытта үлэ дуогабарыгар эбии сөбүлэҥ түһэрсэр, — диэн Машаров RT-ны кытта кэпсэтиигэ бэлиэтээтэ.

Кини этэринэн, үлэ биэрээччи итии кэмҥэ үлэһиттэр доруобуйаларын харыстааһыҥҥа үлэ күнүн бэйэтэ кылгатыан сөп.

Кини СанПиН 1.2.3685-21 нуормаларыгар болҕомтону уурда, манна дьиэ иһинээҕи температура көрдөрүүтүттэн көрөн үлэ бириэмэтин кылгатыы көрүллэр: 28,5 кыраадыска — биир чаас, 29 кыраадыска — икки чаас, 30,5 кыраадыска — түөрт чаас. Оттон 32,5 кыраадыска үлэ тохтотуллуохтаах.

Машаров быһаарбытынан, дьиэ иһигэр кондиционер баар буоллаҕына, үлэ күнүн кылгатыы ирдэммэт. Оттон үлэ биэрээччи итиигэ үлэ усулуобуйатын тупсарарга туох да миэрэни ылбатаҕына, үлэһиттэр, суругунан сэрэтэн баран, үлэлэриттэн барыахтарын сөп.

Маныаха бу борогуулунан ааҕыллыбат, суут быраактыката ону көрдөрөр. Эксперт санаппытынан, үлэ биэрээччи тэрилтэтигэр сөптөөх температура усулуобуйатын хааччыйар эбээһинэстээх.