«Куйаар далай түһүлгэ» — өрөспүүбүлүкэтээҕи ыччат оһуокай этээччилэрин күрэҕэ ыытыллыа

Былырыын бастакытын ыытыллыбыт ыам ыйын 25 күнүгэр бэлиэтэнэр Оһуокай күнүн чэрчитинэн ыччакка аналлаах өрөспүүбүлүкэтээҕи куонкурус ыытыллар. Куонкурус Улуу Кыайыы 80 уонна С.А. Зверев-Кыыл Уола төрөөбүтэ 125 сылыгар ананар. Куонкурус сүрүн соругунан саха үгэс буолбут төрүт үҥкүүтүн, дойдубут биир материальнайа суох култуура нэһилиэстибэтин – оһуокайы тарҕатыы уонна харыстааһын буолар.

Быйылгы ыччакка аналлаах оһуокай этээччилэр күрэхтэһиилэрэ СӨ Бырабыыталыстыбатын өйөөһүнүнэн,  СӨ Култуураҕа уонна духуобунай сайдыыга министиэристибэтин тэрийиитинэн ыытыллар.

Куонкуруска 18-35 саастаах ыччат кыттар. Манна этээччилэр өрөспүүбүлүкэтээҕи, улуустааҕы куонкурустар кыайыылаахтара уонна саҥа саҕалааччылар диэн икки категориянан арахсан күрэхтэһэллэр. Куонкурус муус устар 7-ттэн ыам ыйын 22 күнүгэр диэри 3 түһүмэҕинэн ыытыллар:

1-кы түһүмэх – муус устар 7-27 күннэрэ. Куорат уонна нэһилиэк таһымыгар күрэхтэһии;

2-с түһүмэх – ыам ыйын 5-15 күннэрэ. 1-кы түһүмэх кыайыылаахтара улуус таһымыгар күрэхтэһэллэр;

3-с түһүмэх – ыам ыйын 21-22 күннэрэ. Дьокуускай куоракка Д.К. Сивцев-Суорун Омоллоон аатынан Опера уонна балет судаарыстыбаннай тыйаатырыгар өрөспүүбүлүкэ таһымнаах күрэхтэһии.

Кыайыылаахтары наҕараадалааһын:

Кыайыылаахтары икки категориянан тус-туһунан таһааран, СӨ Бырабыыталыстыбатын дипломунан уонна харчынан бириэмийэнэн наҕараадалыахтара.

Эрдэ өрөспүүбүлүкэ, улуус кыайыылаахтара:

1-кы истиэпэннээх лауреат – 120 тыһ. солк.;

2-с истиэпэннээх лауреат – 100 тыһ. солк.;

3-с истиэпэннээх лауреат – 80 тыһ. солк.

Саҥа саҕалааччылар:

1-кы истиэпэннээх лауреат – 100 тыһ. солк.;

2-с истиэпэннээх лауреат – 80 тыһ. солк.;

3-с истиэпэннээх лауреат – 60 тыһ. солк.

1-кы истиэпэннээх лауреат аатын ылбыттар от ыйын 3-6 күннэригэр Иркутскай уобаласка ыытыллар норуоттар икки ардыларынааҕы «Ёрдынские игры – игры народов Евразии» этнокултуурунай бэстибээлгэ кыттар путевканы тутуохтара.

Хаартыска:
Ыччат министиэристибэтин телеграм-ханаалыттан