Кувшинка – кэрэ көстүү

Төрөөбүт маанылаах түөлбэбит –  
Төлөнө бараммат үөрүүбүт,
Уоскутар ураты алыптаах
Уостубат тапталбыт, Ороһу!
– диэн Геннадий Бечеряков суруйбут тылларын Сардаана Васильева хаартыскаҕа түһэриилэрэ тупсараллар.

Бу хаартыскаҕа быйыл 125 сылын бэлиэтээбит нэһилиэк дьоно-сэргэтэ Эбэҕэ үүнэр кэрэ кувшинкалары кэрэхсиир түгэннэрин көрөбүт. Оттон хаартысканы Альбина Павлова-Харлампьева дойдутугар бэлэх ууммут уруһуйа ситэрэр.
Аныгы дьон куйаар ситимин кыраҕытык кэтиир. Сахабыт сирин араас улуустарыгар сайыҥҥы кэрэ түгэҥҥэ хаартыскаҕа түспүт, сылдьыбыт дьону көрөн, ыраахтан да олорон, ол түгэҥҥэ сылдьыбыт курдук сананаҕын.
Туристар кувшинка көрө ыраах Өймөкөөн сиригэр айанныыр буоллахтарына, Үөһээ Бүлүү Ороһутугар эмиэ маннык түгэн кэнники сылларга элбээтэ. Кыраттан саҕаламмыт сайыҥҥы кэм туһалаах дьарыгын туһунан Ороһу нэһилиэгин олохтооҕо Сардаана Васильева «Киин куоракка» маннык кэпсээтэ:

– Кувшинкалар Эбэҕэ аҕыйах сылтан бэттэх үүнэр буоллулар. Сылын аайы элбээн иһэллэр. От ыйыттан атырдьах ыйын ортотугар диэри баар буолуохтара. Кувшинка сибэккитэ күнүс күннээххэ арыллар. Киэһэ алтаттан сабыллар. Уонна ууга тимирэр.

Ыалбыт Петр Семенович Ивановтуун кыттыһан, быйыл сибэккилэри көрөргө анаан курдары көстөр тыы ыллыбыт. Уонна уу үрдүнэн сылдьар икки сап диэн тэриллээхпит. Сибэккини көрө кэлбит дьоммутун тыыга олордон, устан иһэн хаартыскаҕа түһэрэбит, видеоҕа устабыт. Киһиэхэ биир умнуллубат кэрэ түгэн буоларыгар эрэнэбит. Онон Эбэбит күөлүгэр
үтүөкэн сибэкки үүнэрин көрбүт эрэ киһи иһийэ таптыыр. Кинини уу Сардааната диэн ааттыыллар.