Кууруссаттан сонун бүлүүдэлэр

Бүгүн ааҕааччыларбытыгар астыырга чэпчэки уонна судургу, ол эрээри олус минньигэс уонна тотоойу бүлүүдэлэр ырысыаптарын бэчээттиибит. Дьиэлээхтэргитин күндүлээҥ, үөрэ-көтө астааҥ!

Ыыһаммыт кууруссалаах, кукурузалаах салаат

Туох наадата:

- сымыыт – 2 уст.;

- ыыһаммыт куурусса буута – 250 г;

- оҕурсу – 1 уст.;

- кэнсиэрбэлэммит кукуруза – 150 г;

- эриэппэ луук – 1 уст.;

- майонез – 30 г;

- 9%-наах уксуус (маринадка) – 50 мл.

Астааһына:

Бастаан луук маринадын оҥоробут. Хахтыыбыт, тымныы ууга сайҕыыбыт. Онтон бытархай гына кырбаан баран үрдүгэр уксуус кутабыт. 7-10 мүн. туруора түһэбит. Онтон уксууһун тоҕобут, луугу тымныы ууга сайҕыыбыт.

Бүтэйдии буспут сымыыты хахтыыбыт, кыра гына кырбыыбыт. Ыыһаммыт куурусса буутун тириититтэн уонна уҥуоҕуттан араарабыт. Этин кырбаан баран иһиккэ кутабыт.  Оҕурсуну сууйабыт, соломолуу кырбыыбыт. Онно кэнсиэрбэлэммит кукурузаны уутун сүөкээн баран эбэбит. Майонез кутабыт уонна үчүгэйдик булкуйабыт.

Пудинг

Туох наадата:

- куурусса куҥ этэ – 500 г;

- сымыыт –  3 уст.;

- эриэппэ луук – 80 г;

- ынах арыыта – 10 г ;

- мас арыыта – 20 мл;

- туус, тума – бэйэ сөбүлүүрүнэн;

- панировочнай суухара – 20 г.

Астааһына:

Куурусса этин мясорубкаҕа эрийтэрэбит. Луугу хахтаан, кыра гына куубуктуу быһабыт, саһарыар диэри мас арыытыгар ыһаарылыыбыт. Сымыыты үрүҥүн уонна араҕаһын араарабыт, үрүҥүн кымаах тууһу кытта күүгэннириэр диэри ытыйабыт.

Эриллибит эти блендер иһитигэр кутабыт, туус, тума, сымыыт уоһаҕын эбэбит, биир кэлим маасса буолуор диэри эрийтэрэбит. Онно сымыыт үрүҥүн, ыһаарыламмыт луугу холбуубут уонна үчүгэйдик булкуйабыт.

Киэп түгэҕэр панировочнай суухараны табыгынатабыт, онно маассабытын кутабыт, үрдүгэр суухараны табыгынатабыт, онтон ынах арыытын кыра гына кырбаан баран уурабыт. 

220 кыраадыс итийбит духуопкаҕа бастаан 15 мүн. буһарабыт, онтон 180 кыраадыска диэри кыччатабыт. Итиэннэ 20-25 мүн. буһарабыт. 

«Тиффани» салаат

Туох наадата:

- куурусса түөһүн этэ – 500 г;

- буспут сымыыт – 4 уст.;

- кыһыл луук – 1 уст.;

- кытаанах сыыр – 100 г;

- грецкэй эриэхэ – 100 г;

- майонез – 150 г;

- виноград – 100 г;

- туус – бэйэ сөбүлүүрүнэн.

Астааһына:

Эти уонна сымыыты эрдэ буһаран, сойутан бэлэмниибит. Эти буһарыах иннинэ туустуур ордук. Грецкэй эриэхэни кураанах хобордооххо ыһаарылыыбыт. Уҥуоҕа суох, от күөҕэ өҥнөөх, минньигэс амтаннаах винограды талар ордук.

1-кы араҥа – куурусса этэ уонна луук. Бытархай гына кырбыыбыт. Иһиккэ иккиэннэрин аҥаардаан кутабыт. Майонеһынан сыбыыбыт.

2-с араҥа – ыһаарыламмыт эриэхэ. Үлтүрүтэн баран кутабыт.

3-с араҥа – сыыр. Бөдөҥ харахтаах түөркэҕэ анньабыт, эмиэ аҥаарын кутабыт, онтон майонеһынан сыбыыбыт.

5-с араҥа – бүтэйдии буспут сымыыт. Хахтаан баран бөдөҥ харахтаах түөркэҕэ анньабыт. Эмиэ аҥаарын кутабыт, майонезтыыбыт.

Бу кэннэ ордубут ингредиеннэрбитинэн араҥабытын барытын бэрээдэгинэн хос хатылыыбыт. 

Винограды сууйабыт уонна куурдабыт, хас биирдиитин ортотунан аҥаардыыбыт. Итиэннэ салааппыт үрдүгэр уурталыыбыт. Остуолга холодильникка туруора түһэн баран уурар ордук. Күөх үүнээйинэн киэргэтиэххэ сөп.

Мүөт, хартыыһа маринадтаах куурусса сотото

Туох наадата:

- куурусса сотото – 1 кг;

- мүөт – 2 ост.нь.;

- хартыыһа – 2 ост.нь.;

- оливка арыыта – 2 ост.нь.;

- туус, тума – бэйэ сөбүлүүрүнэн.

Астааһына:

Бастаан маринадын бэлэмниибит. Киэҥ иһити ылар ордук. Хартыыһаны уонна мүөтү булкуйабыт. Мүөт хойдон хаалбыт буоллаҕына, микроволновай оһоххо сылытан  убатыахха сөп. Онтон оливка арыытын, туус, тума эбэбит. Онно куурусса сотолорун үҥкүрүтэбит.

Духуопкаҕа угуллар керамика иһити арыынан сотобут, онно куурусса сотолорун угабыт, ордубут маринадынан сыбыыбыт. Онтон фольганан бүрүйэн баран 190 кыраадыс итии духуопкаҕа 45-50 мүнүүтэ буһарабыт. Таһаарыахпыт 20 мүнүүтэ иннинэ фольгатын ылабыт, оччоҕуна куурусса саһарчы буһар.

Остуолга хортуоппуйу, сибиэһэй оҕуруот аһын кытта ууруохха сөп.

Дьиэтээҕи удон

Туох наадата:

- Вок лапса – 150 г;

- куурусса куҥ этэ – 250 г;

- моркуоп – 1 уст.;

- эриэппэ луук – 1 уст.;

- минньигэс биэрэс – 0, 5 уст.;

- чеснок – 1 өлүүскэ;

- күөх луук – 2 г;

- соевай соус – 5 ост. нь.;

- имбирь бороһуога – 0,5 ч.нь.;

- уу – 0,5 ыст.;

- мас арыыта – 3 ост. нь.;

- туус – бэйэ сөбүлүүрүнэн.

Астааһына:

Бастаан оҕуруот астарын сууйан, хахтаан, ыраастаан бэлэмниибит. Биэрэс (кыһыл өҥнөөҕө ордук көстүүлээх) сиэмэтин ылан быраҕабыт, 3-5 см усталаах гына кырбыыбыт. Моркуобу быһа холоон 3-5 см усталаах, 2 мм халыҥ гына быһабыт. Эриэппэ луугу бытархай гына куубуктуу быһабыт. Чесногу илдьиритэбит. Күөх луугу бытархай гына кырбыыбыт.

Куурусса куҥ этин быһа холоон 1 см усталаах уонна 1 см туоралаах гына кырбыыбыт.

Халыҥ түгэхтээх хобордооххо мас арыытын кутан сылытабыт, онно луугу уонна чесногу саһарыар диэри ыһаарылыыбыт. Салгыы онно хаалбыт оҕуруот астарын, күөх луугу, кууруссаны кутабыт. Булкуйа-булкуйа ыһаарылыыбыт.

Онтон хобордооххо ыстакаан аҥаара ууну, соевай соуһу эбэбит, имбирь табыгынатабыт. Барытын булкуйабыт уонна хобордоохпутун хаппахтыыбыт. Оҕуруот астара сымныахтарыгар, соуһа хойдуор диэри бытаан уокка туруорабыт, булкуйарбытын умнубаппыт. Кыратык туус кутуохха сөп.

Лапсаны туустаах ууга буһарабыт, хаҕыгар хайдах буһарыллара суруллубут буолар. Бустаҕына, уунан сайҕыыр наадата суох, уутун сүөкээн баран, тута хобордооххо кутабыт уонна 3-4 мүн. бытаан уокка туруора түһэбит. Тууһа биллибэт буоллаҕына, эбэн биэриэххэ сөп.

Тайдыы буспут куурусса

Туох наадата:

- куурусса куҥ этэ – 500 г;

- минньигэс биэрэс – 1 уст.;

- мас арыыта – 1 ост.нь.;

Маринадка:

- соевай соус – 70 мл;

- уу – 50 мл ;

- чеснок – 2 өлүүскэ;

- мас арыыта – 2 ост.нь.;

- мүөт – 1 ост.нь.;

- имбирь бороһуога – 0,5 ч.нь.;

- бурдук – 1 ост.нь.;

- карри – 1 ч.нь.;

- мэлиллибит хара биэрэс (кымаах) – 2 г.

Астааһына:

Бастаан маринадын бэлэмниибит. Дириҥ иһиккэ соевай соуһу, ууну, мас арыытын, мүөтү уонна бурдугу кутан булкуйабыт. Онно чесногу (хахтаан, илдьиритэн), каррины, мэлиллибит хара биэрэһи, имбирь бороһуогун эбэбит. Барытын биир кэлим маасса буолуор диэри үчүгэйдик булкуйабыт.

Салгыы куурусса этин уһаты бысталыыбыт уонна маринадтаах иһиккэ кутабыт. Булкуйан баран 40 мүн. кэриҥэ сытыара түһэбит.

Бу кэмҥэ биэрэһи сууйан, сиэмэтин ыраастаан, уһаты бысталыыбыт. Хобордооххо мас арыытын кутан сылытабыт, онно биэрэһи быһа холоон 7 мүн. ыһаарылыыбыт. Онтон туспа иһиккэ көһөрөбүт.

Салгыы хобордооххо куурусса этин саһарыар диэри ыһаарылыыбыт. Онно биэрэспитин, маринадпытын эбэбит. Үчүгэйдик булкуйан баран 10 мүн. бытаан уокка туруорабыт.

Остуолга ууруох иннинэ кунжут табыгынатан киэргэтиэххэ сөп.