Куттал суох буолуутун боппуруостарын дьүүллэстилэр

Мунньахха куорат куттала суох буолуутун хааччыйыы, сэрэтии уонна чугаһаан иһэр маассабай тэрээһиннэргэ бэлэмнэнии тула кэпсэттилэр.

Сүрүн болҕомто ураты эрэсиимнээх сирдэргэ тырааныспар киириитин хааччахтааһыҥҥа, ону тэҥэ маассабай тэрээһиннэр буолар сирдэригэр кутталлаах табаары, чуолаан арыгыны уонна пиротехниканы атыылааһыны хонтуруоллааһыҥҥа уурулунна.

Евгений Григорьев Туймаада Ыһыаҕын кэмигэр сокуону кэһии ханнык баҕарар көстүүтүн тута бохсорго, мобильнай түргэнник дьаһанар бөлөхтөрү тэрийэргэ уонна «Үс Хатыҥ» сирин-уотун күрүөтүн-хаһаатын бэрэбиэркэлииргэ миэстэтигэр тахсан көрөргө сорудахтаата.

Эбии, чугаһаан иһэр биир кэлим быыбар күнүгэр бэлэмнэнии чэрчитинэн, Евгений Григорьев быыбардыыр хампаанньа куттала суох буолуутугар тохтоото. Быыбардыыр учаастактары харабыллааһыҥҥа, быыбардааччылар харгыһа суох киириилэрин хааччыйыыга уонна хамыыһыйалар тохтоло суох үлэлэрин тэрийиигэ ураты болҕомтону уурарга быһаарыстылар. Куорат баһылыга туһааннаах сулууспаларга бары учаастактары эрдэттэн бэлэмнэрин бэрэбиэркэлииргэ уонна пууннары видео-кэтээн көрүү систиэмэтинэн хааччыйарга сорудахтаата.