Куорат төрөппүттэрин болҕомтотугар: Куруһуоктарга суруйтарарга 2025/26 үөрэх дьылын талыҥ

Биллэрин курдук, оскуола оҕотун эбии дьарыктарга “Навигатор” уонна “Госуслуги” эрэ нөҥүө онлайн ньыманан суруйтарабыт. Былырыын баларга эмиэ кэһиллии тахсан, куруһуоктан маппыт киһи үгүс этэ. Быйыл хартыына хатыланна...

Ол иһин "Киин куорат" үгүс оҕо талаһар Оҕо айымньытан дыбарыаһын салалтатыттан быһааралларыгар көрдөстө.

Ф.И. Авдеева аатынан Оҕо айымньытын дыбарыаһын дириэктэрэ Татьяна Иванова:

– Биһигиттэн тутулуктааҕы барытын оҥорбуппут. Тургутан көрүүнү этэҥҥэ ааспыппыт, барыта буолуохтааҕын курдук үлэлиир этэ... Бүгүн кэлэн, былырыыҥҥы курдук, маассабай кэһиллии таҕыста – биһиги буруйбут суох, бу өҥөнү биэрээччи ("Центр новых технологий" – Аапт.) буруйа.

Ол иһин биһиги Оҕо айымньытын дыбарыаһыгар төрөппүттэр бэйэлэрэ кэлэн биэрэр сайаапкаларын ылыыны тэрийдибит. Куруһуоктарга суруйтарыы балаҕан ыйын 7-гэр диэри барыаҕа. Сарсыҥҥыттан Дыбарыас бастакы этээһигэр үлэһиттэр олорон сайаапкалары салгыы тутуохтара. Бүгүн "Куруһуоктар дьаарбаҥкалара" буола турар.

Кэһиллии таҕыстаҕына, маннык элбэх төрөппүт тоҕо анньан кэлэригэр бэлэм этибит, барыларыттан сайаапкаларын ылабыт – хас чааска кэлэн биэрбиттэрэ, бириэмэлэрэ бэлиэтэнэр. Куруһуоктар салайааччылара 10 күн иһинэн төрөппүттэргэ сибээскэ тахсыахтара.

Валентина Степанова, сүрүн методист, Эбии үөрэхтээһиҥҥэ иитэр-үөрэтэр үлэҕэ сектор салайааччыта:

– Куруһуоктарга уонна секцияларга саҥа үөрэх дьыла балаҕан ыйын 7 күнүттэн саҕаланар диэн бэлиэтээн этиэххэ наада. Онуоха диэри биһиги баҕалаах оҕолору дьарыктарга суруйуохтаахпыт.

Быйыл эмиэ төрөппүттэр сатаан суруйтарбакка олороллор. Ол иһин билигин "2025-26 үөрэх дьылын талан суруйтарыҥ" дии олорорбут, тоҕо диэтэххэ бу үөрэх дьыла атырдьах ыйын 30 күнүгэр диэри барар. Балаҕан ыйыттан атын үөрэх дьыла (2026-27) саҕаланар, онуоха биһиги былырыыҥҥы сайаапкалары киирэн көрөр кыахтаах буолабыт диэн техподдержка эрэннэрэр, сайаапкалар ханна да сүппэттэр.
 

Ытыктабыллаах төрөппүттэр!

"Запись закрыта”, “мест свободных нет” диэн кэлэ турар буоллаҕына, Дыбарыаска бэйэҕит кэлэн суруйтарыаххытын сөп. Сарсын эмиэ оператордар олорон төрөппүттэри кытта үлэлиэхтэрэ. Сайаапканы электроннай ньыманан уонна кумааҕынан биэриэххитин сөп.