Кур иэстээх УК-лар тустарыттан – биирдиилээн дуогабардаһыыга?

ДЭК телеграмм-ханаалыгар суруллубутунан, уот иһин төлөбүрү хомунаалынай өҥөнү толорор УК-лар кэмигэр ыыппаттарыттан сылтаан, нэһилиэнньэ уотунан хааччыллыытыгар күчүмэҕэй үөскүөн сөп. Сыл саҕаланыыта ДЭК саайтыгар тахсыбыт кур иэстээхтэр испииһэктэригэр уопсайа холбоон 61,4 мөл. солк. иэстээх 16 тэрилтэ киирэ сылдьар.  Кинилэртэн муҥутуур улахан иэстээх «УК Гарант Плюс» ХЭТ билигин да 4 элбэх кыбартыыралаах дьиэни хааччыйа олороро бэлиэтэммит. Бу тэрилтэ иэһэ 2025 сыл тохсунньутуттан өссө 626 тыһ. солк. эбиллэн, уопсайа 26,6 мөл. солк. буола “үллүбүт”.

Оттон «Ярославское» ХЭТ туттуллубут уот уонна сылытыы иһин 12,4 мөл. солк. иэстээх. Кинилэри тилэх баттаһа, 9 мөл. солк. иэстээх "Восхождение" УК сылдьар. Бу хампаанньа 85 дьиэ олохтоохторун кытта дуогабардаах.  Ону таһынан иэстээхтэр ортолоругар «УК АРТ Плюс» ХЭТ  (5,6 мөл. солк.), «Центральное» ЖЭУ ХЭТ (2,4 мөл. солк.), «Автодорожная 19» ЖСК (1,4 мөл. солк).  Толору испииһэги ДЭК саайтыгар киирэн көрүөххэ сөп.

ДЭК олохтоохтор улахан аҥаардара хомунаалынай өҥө төлөбүрүн кэмигэр төлөһөр, оттон сорох УК-лар киирбит үбү уотунан, сылааһынан хааччыйар тэрилтэҕэ кэмигэр төлөһөргө тиэтэйбэттэр. Ол да иһин “Якутскэнергосбыт” былырыын СӨ Борокуратууратыгар салайар хампаанньалар лиссиэнсийэ ирдэбилин толоостук кэһэллэр диэн 14 сайабылыанньаны түһэрбит. Иннинээҕи 2023 с. үс хампаанньа административнай ыстыраапка түбэспит. Уопсайа ааспыт сыл устата хомунаалынай өҥөнү толорооччулар иэстэрин төлөтөөрү 169 үҥсүү (иск) суруллубут. Суут уопсайа 2022-2024 сс. холбоон, 107,4 мөл. солк. иэһи төлүүргэ уураахтаабыта этиллэр.

Бу маннык быһыы-майгы тахсыбатын туһугар, сылааһынан, уотунан хааччыйар тэрилтэлэр олохтоохтору кытта быһаччы дуогабар түһэрсэн, УК-нан эргиппэккэ, быһа төлөһүүнү киллэрэргэ дьүккүөрдэммиттэрэ көстөр. Дьиҥинэн, олохтоохторго “сэттэ сиринэн сүүрэ” сатаабакка, биир сиргэ, УК-ҕа тиийэн дуогабардаһан баран, биир сиргэ төлөһүү табыгастаах. Ол эрээри төлөммүт үп тустаах аадырыһыгар тиийбэтиттэн сэдиптээн, поставщиктар үгүстэрэ да сыыйа биирдиилээн дуогабарга көһөр чинчилээхтэр.

Сиһилии испииһэги https://www.dvec.ru/iku/rating/yakutiya/ билсиэххэ сөп.