Куораты сааскы ыраастааһын тула мунньахтаатылар

Дьокуускай куорат сааскы санитарнай ыраастааһыҥҥа ыстаабын нэдиэлэтээҕи мунньаҕа буолла. Куорат баһылыгын солбуйааччы Владислав Слепцов салайыытынан ыытыллыбыт мунньахха хаары ыраастааһын хаамыытын уонна халаан уутун аһарарга бэлэмнэнии туһунан кэпсэттилэр. Уокуруктар уонна куорат кытыытынааҕы бөһүөлэктэр территориятааҕы салайар уорганнарын салайааччылара, куорат хомунаалынай сулууспаларын үлэһиттэрэ ыраастааһыҥҥа ыытыллыбыт үлэлэри сиһилии отчуоттаатылар. 
Ол курдук, уопсайа, кулун тутар ыйга Дьокуускай уулуссаларыттан уонна суолларыттан 234 тыһ. куб. м. тахса хаар таһыллыбыт. Муус устарга – 13 тыһ. куб. м тахса. 2024 с. алтынньытыттан муус устар 2 күнүгэр диэри тиэйиллибит хаар уопсай кээмэйэ – 507 тыһ. куб. м. тахса.  
Мунньахха хаары тиэйиини сэргэ сааскы хаар уутун аһардарга ыытыллар бэлэмнэнии үлэтэ хайдах баран иһэрин кэпсээтилэр.

Хаартыска: Куорат уокуруктааҕы дьаһалтатын сайтыттан